មកដល់ពេលនេះ មហាជនអ្នកគាំទ្រជាច្រើននៅតែរំភើបនឹងទិដ្ឋភាពនៃពិធីមង្គលការដ៏ធំអធឹកអធមរបស់កំពូលតារាចម្រៀងរ៉េប លោក ជី ដេវីត និង អ្នកនាង ទេព បូព្រឹក្ស នៅឡើយ ដែលពួកគេបានរៀបចំកម្មវិធីរៀបអាពាហ៍ពិពាហ៍តាមប្រពៃណីនៅថ្ងៃទី ៧ ខែមិថុនា ឆ្នាំ ២០២៥ កន្លងទៅ ដោយកាលនោះគេចាំបានថា កម្មវិធីទាំងមូលបានរៀបចំឡើងធំដុំសម្បើមណាស់ ហើយមានវត្តមានភ្ញៀវកិត្តិយសទាំងអ្នកមានឋានៈក្នុងសង្គម និង សិល្បករល្បីៗលំដាប់ប្រទេស។
ដ្បិតថាចាប់តាំងពីទាក់ទងគ្នារហូតដល់ថ្ងៃអ្នកទាំងពីរកំណត់ថ្ងៃចូលរោងការតាមប្រពៃណីជិត ១០ ឆ្នាំមកនេះ ទេព បូព្រឹក្ស និង ជី ដេវីត មិនធ្លាប់បង្ហើបពីការផ្ដើមស្នេហ៍ដំបូងរបស់ពួកគេឡើយ ទើបតែនៅថ្ងៃរៀបមង្គលការកន្លងទៅ អ្នកទាំងពីរបានទម្លាយថា លោក ឆន សុវណ្ណារាជ គឺជាមេអណ្ដើកធ្វើឱ្យពួកគេទាំងពីរបានជួប និង ស្រឡាញ់គ្នាមកដល់សព្វថ្ងៃ ដោយកាលនោះ ពួកគេបានទៅទទួលទានអាហារពេលល្ងាចនៅផ្ទះលោក ឆន សុវណ្ណារាជ ហើយចាប់តាំងពីពេលនោះមក អ្នកទាំងពីរក៏ចាប់ផ្ដើមស្គាល់មើលចិត្តថ្លើមគ្នា។
បើនិយាយទៅដូចជារឿងចៃដន្យមួយ អ្នកនាង ទេព បូព្រឹក្ស ធ្លាប់បានលើកឡើងថា អ្នកនាងមិនចូលចិត្តបុរសដូចលោក ជី ដេវីត ឡើយ តែចុងក្រោយអ្នកនាងក៏លង់ស្រឡាញ់លោករហូតសម្រេចចិត្តរួមរស់រៀបការជាមួយគ្នាជាប្ដីប្រពន្ធ៕
