មិនសូវផុសរូបបង្ហាញដូចគេមែន តែ ខេម ស្រឡាញ់ភរិយាខ្លាំង សាក់ឈ្មោះ និង ថ្ងៃខែឆ្នាំរៀបការលើដៃបញ្ជាក់ចិត្តស្មោះ

និយាយដល់ជីវិតស្នេហារបស់តារាចម្រៀងប្រុសល្បីឈ្មោះ ខេម មកដល់ពេលនេះ រយៈពេលជាង ៤ ឆ្នាំមកហើយ ដែលតារាចម្រៀងប្រុសរូបនេះបានបើកបង្ហាញមុខម្ចាស់បេះដូងជាស្រីស្អាតរូបស្រស់អ្នករស់នៅប្រទេសបារាំងឈ្មោះថា ស្រីកា បណ្ដើរគ្នាពេញមុខពេញមាត់ ក្រោយទាក់ទងមើលចិត្តគ្នាជាច្រើនឆ្នាំ។

ក្រោយបង្ហាញជាសាធារណៈពីទំនាក់ទំនងស្នេហា កន្លងមក ខេម និង គូស្នេហ៍ ត្រូវបានមហាជនភាគច្រើនដឹងថាទាក់ទងគ្នាក្នុងនាមជាគូដណ្ដឹង ដោយមិនទាន់លេចឮដំណឹងពីការរៀបចំកម្មពិធីមង្គលឡើយ ប៉ុន្តែក៏ត្រូវបានគេដឹងថាអ្នកទាំងពីរបានក្លាយជាប្ដីប្រពន្ធស្របច្បាប់រួចហើយដែរ គ្រាន់តែមិនដែលបង្ហាញជាសាធារណៈប៉ុណ្ណោះ។

ដោយឡែក អ្វីកាន់តែចាប់អារម្មណ៍ចំពោះគូស្នេហ៍មួយគូនេះ កាលពីថ្ងៃទី ៦ ខែកុម្ភៈ ឆ្នាំ ២០២៥ កន្លងទៅ ទើបដឹងថាតាមពិតអ្នកទាំងពីរបានរួមរស់ប្រើឈ្មោះជាស្វាមីភរិយានឹងគ្នារយៈពេល ៩ ឆ្នាំមកហើយ ក្រោយពីបានឃើញមិត្តភក្តិបងប្អូនរៀបចំកម្មវិធីអបអរខួបអាពាហ៍ពិពាហ៍គម្រប់ខួប ៩ ឆ្នាំឱ្យ ខេម និង ភរិយាសំណព្វចិត្តរបស់លោកពោរពេញដោយភាពផ្អែមល្ហែម។

លើសពីនេះ បើក្រឡេកទៅចាប់អារម្មណ៍រូបភាពលើហ្វេសប៊ុករបស់លោក ខេម មួយរយៈថ្មីនេះ កាន់តែសរសើរពីជីវិតប្ដីប្រពន្ធរបស់លោក ដ្បិតតែតារាចម្រៀងប្រុសរូបនេះ មិនសូវបង្ហាញសកម្មភាពផ្អែមល្ហែមរវាងប្ដីប្រពន្ធលើបណ្ដាញសង្គមញឹកញាប់ដូចសិល្បករដទៃមែន ប៉ុន្តែឃើញថាលោកពិតជាស្រឡាញ់ និង ផ្ដល់ឱ្យតម្លៃឱ្យភរិយាបណ្ដូលចិត្តខ្លាំង ក្រោយឃើញលើដៃម្ខាងរបស់លោកបានសាក់រូបឈ្មោះកាត់របស់ភរិយាថា «KA» និង ថ្ងៃខែឆ្នាំ «02.06.2016» ដែលជាថ្ងៃរៀបអាពាហ៍ពិពាហ៍របស់លោក និង ភរិយាទៀតផង៕