បង្ហាញប្រវត្តិសិក្សា និង ការងារលោកជំទាវ ហូ សុវណ្ណិកា រដ្ឋលេខាធិការក្រសួងអភិវឌ្ឍន៍ជនបទ សមជាស្ត្រីខ្លាំងសម័យថ្មី និង ពូកែដឹកនាំ

រូបសម្រស់ក្មេងវ័យលាយឡំស្នាមញញឹមដ៏មានថាមពល លោកជំទាវ ហូ សុវណ្ណិកា ត្រូវបានចាត់ទុកជាស្ត្រីខ្លាំង ស្ត្រីពូកែ និង មានរបៀបដឹកនាំក្នុងការងារដ៏ឈ្លាសវៃ។ បច្ចុប្បន្ន លោកជំទាវគឺជារដ្ឋលេខាធិការក្រសួងអភិវឌ្ឍន៍ជនបទនៅកម្ពុជា។ ក្នុងតួនាទី លោកជំទាវលើកកម្ពស់អភិបាលកិច្ចល្អ តម្លាភាព​ និង ឧត្តមភាពសេវាកម្ម។ មហិច្ឆតារបស់លោកជំទាវ គឺលើកកម្ពស់សហគមន៍តាមរយៈគម្រោងប្រកបដោយនិរន្តរភាព ដែលផ្តល់ផលយូរអង្វែង។ រាប់តាំងពីការលើកកម្ពស់សមភាពយេនឌ័រ រហូតដល់ពង្រឹងហេដ្ឋារចនាសម្ព័ន្ធជនបទ លោកជំទាវសហការជាមួយអ្នកដឹកនាំក្នុងស្រុក និង ដៃគូអន្តរជាតិ ដើម្បីអនុវត្តគំនិតផ្តួចផ្តើមលើកកម្ពស់ជីវភាពរស់នៅ បង្កើតសាមគ្គីភាព និង ជំរុញវឌ្ឍនភាព។

មានមូលដ្ឋានគ្រឹះសិក្សារឹងមាំ លោកជំទាវ ហូ សុ​វណ្ណិកា បានសិក្សាបរិញ្ញាបត្រអក្សរសាស្ត្របារាំង និង ការសិក្សាជាច្រើនទៀត រួមទាំងវគ្គសិក្សា Criterion Course នៅសាលាភូមិន្ទរដ្ឋបាល។ ក្រោយបញ្ចប់ការសិក្សា ការចាប់ផ្តើមការងារហាត់ការដំបូងជាមួយភ្នាក់ងាររដ្ឋាភិបាល បានធ្វើឱ្យលោកជំទាវមានចំណូលចិត្តខ្លាំងនៅក្នុងវិស័យនេះ តួយ៉ាង លោកជំទាវបានចូលរួមយ៉ាងសកម្ម និង ទទួលបានការយល់ដឹងជាក់ស្តែងក្នុងការអនុវត្តគោលនយោបាយ។ បទពិសោធដំបូងក្នុងអាជីពការងារនេះ ក៏បានបង្កើតជាមូលដ្ឋានគ្រឹះ ដែលធ្វើឱ្យលោកជំទាវដាក់ចិត្តដាក់កាយចំពោះសេវាសាធារណៈ បំពេញវាដោយក្តីស្រលាញ់ ការដឹងគុណ និង ប្តេជ្ញាអស់ពីចិត្ត។

ក្នុងនាមជាអ្នកដឹកនាំម្នាក់ លោកជំទាវ ហូ សុ​វណ្ណិកា ជឿជាក់ថា សេវាសាធារណៈតម្រូវឱ្យមានការបញ្ចូលគ្នានូវ ចក្ខុវិស័យ ការសហការ ការសម្របខ្លួន និង ស្មារតីទទួលខុសត្រូវខ្ពស់។ ការងាររបស់លោកជំទាវគឺត្រូវប្រាកដថា គោលនយោបាយ និង កម្មវិធីផ្សេងៗជំរុញការអភិវឌ្ឍន៍ប្រកបដោយចីរភាព ជំរុញសមធម៌សង្គម និង កសាងទំនុកចិត្តសាធារណៈ។ លោកជំទាវថា ភាពជាអ្នកដឹកនាំ មិនមែនជាការសរសើរផ្ទាល់ខ្លួនទោះទេ វាគឺជាការជំរុញដល់អ្នកដទៃ និង ធ្វើការទាំងអស់គ្នាឆ្ពោះទៅរកចក្ខុវិស័យរួមគ្នានៃឧត្តមភាពសេវាកម្ម។

ធ្វើបច្ចុប្បន្នភាពលើទម្លាប់ចាស់ ជាស្ត្រីឆ្លាតវៃក្នុងសម័យទំនើប លោកជំទាវបានប្រើបណ្តាញសង្គម ដើម្បីធ្វើទំនើបកម្មការងារនៅក្រសួងអភិវឌ្ឍន៍ជនបទផងដែរ។ ខណៈអ្នកដទៃឃើញថា Platform បណ្តាញសង្គមសម្រាប់តែភ្ជាប់ទំនាក់ទំនងផ្ទាល់ខ្លួន ប៉ុន្តែលោកជំទាវឃើញថា វាជាឧបករណ៍ដ៏សំខាន់សម្រាប់ការសហការ និង ការបង្កើតថ្មី។ លោកជំទាវថា ការភ្ជាប់បណ្តាញសង្គម វាមិនត្រឹមតែជាការរក្សាទំនាក់ទំនងគ្នាប៉ុណ្ណោះទេ តែវាជាការកសាងទំនាក់ទំនងដ៏មានអត្ថន័យ ដែលជំរុញឱ្យមានវឌ្ឍនភាព និង ការចងគ្នាជាសហគមន៍។ ចក្ខុវិស័យរបស់លោកជំទាវ បណ្តាញសង្គមមានសក្តានុពលក្នុងការបើកបង្ហាញទេពកោសល្យ បង្កើតជាកន្លែងសហការ​ និង កសាងបណ្តាញវិជ្ជាជីវៈកាន់តែរឹងមាំ។

សម្រាប់អ្នកចង់ក្លាយជាអ្នកដឹកនាំ លោកជំទាវ ហូ សុ​វណ្ណិកា បានផ្តល់ដំបូន្មានថា ភាពជាអ្នកដឹកនាំ គឺជាការជឿលើខ្លួនឯង ដោយប្រកាន់ខ្ជាប់នូវតម្លៃគ្រួសារ និង មានភាពក្លាហានក្នុងការផ្លាស់ប្តូរ។ ឱបក្រសោបវាជាដំណើរមួយ ដោយមិនត្រឹមតែតំណែង តែថែមទាំងដឹកនាំដោយដាក់ខ្លួន ខ្លាំង និង គោលបំណង៕

ប្រភព៖ Prestige