ចំពោះបវរកញ្ញាពោរពេញដោយប្រជាប្រិយភាពកញ្ញា ប៊ី សុធារី មកដល់ពេលនេះ ទោះមានតំណែងជាបវរកញ្ញា ឬ មិនមាន នាងក៏នៅតែជាបវរកញ្ញាមានសក្ដានុពលក្នុងចិត្តមហាជនអ្នកគាំទ្រដដែលចំពោះរូបនាង ដែលអ្នកគាំទ្រនៅតែបន្តតាមដានគាំទ្រដល់រូបនាងមិនថាចូលរួមកម្មវិធីបវរកញ្ញា ឬ កម្មវិធីផ្សេងៗ។
ជាពិសេស តែងឆក់ការចាប់អារម្មណ៍ពីសកម្មភាពលើបណ្ដាញសង្គម ដែលនាងតែងបង្ហាញពីស្ទីលលេងខ្លួនថ្មីៗហូរហែ ដោយរូបភាពមួយៗក្នុងឈុតដ៏ស្រស់ស្អាតរំលេចលើដងខ្លួនយ៉ាងស្រឡូនទាក់ទាញឥតទាស់របស់នាង ដែលមើលទៅកាន់តែស្រស់ស្អាតប្លែកខ្លាំងពីមួយថ្ងៃទៅមួយថ្ងៃ។
ដោយឡែក មួយរយៈថ្មីកន្លងទៅ អ្វីដែលមហាជនអ្នកគាំទ្រចាប់អារម្មណ៍ និង ភ្ញាក់ផ្អើលខ្លាំង ក្រោយពីឃើញ ប៊ី សុធារី បង្ហាញរូបសម្រស់ថ្មីដោយបានប្ដូរស្ទីលលេងខ្លួនថ្មី កាត់សក់ខ្លីខ្លាំងប្លែកមិនធ្លាប់ឃើញពីមុន ធ្វើឱ្យអ្នកគាំទ្រជាច្រើនក៏មានចម្ងល់ជុំវិញរឿងនេះដែរ។
យ៉ាងណាមិញ ទាក់ទងនឹងរឿងកាត់សក់នេះដែរ ថ្មីៗនេះ កញ្ញា ប៊ី សុធារី ក៏បាននិយាយរៀបរាប់ក្នុងកិច្ចសម្ភាសន៍ «VTalk Confession» ឱ្យដឹងពីមូលហេតុ ២ យ៉ាងដែលធ្វើឱ្យនាងសម្រេចកាត់សក់ខ្លីខ្លាំង ក៏ព្រោះតែនាងចង់ប្ដូរស្ទីលខ្លួនឯង ដែលចង់កាត់សក់បែបនេះតាំងពីក្មេង និង ហេតុផលមួយទៀត គឺព្រោះតែមួយរយៈនេះ នាងស្រ្តេសខ្លាំងរហូតមានបញ្ហាថប់អារម្មណ៍ ដែលជាជំងឺមួយធ្លាប់កើតពីមុនមក ខ្លាចនឹងការចូលសង្គមមនុស្សច្រើន ចូលចិត្តសំងំតែក្នុងបន្ទប់ទៀតផង៕
សូមចុចទីនេះដើម្បីទស្សនាវីដេអូ៖
