ប្រិយមិត្តច្បាស់ជានៅចាំមិនខាន កាលពីប៉ុន្មានឆ្នាំមុនតារាស្រី រ័ត្ន រចនា បានផ្ទុះប្រជាប្រិយភាពខ្លាំង បន្ទាប់ពីលើកយកបទ «មេម៉ាយសប្បាយចិត្ត» មកច្រៀងឡើងវិញ ដែលបទនេះ ត្រូវបានគេដឹងថា ជាសំនៀងដើមរបស់អ្នកស្រី ប៉ែន រ៉ន ហើយចាប់តាំងពីពេលនោះមក ភាពល្បីល្បាញរបស់ រ័ត្ន រចនា ក៏កាន់តែសុសសាយមកដល់បច្ចុប្បន្ន។
ក្រោយសាងឈ្មោះល្បីល្បាញលើវិថីសិល្បៈប៉ុន្មានឆ្នាំមកនេះ រ័ត្ន រចនា មិនត្រឹមតែកែប្រែរូបរាង ស្រស់ស្អាត ដោយស្រកគីឡូជាងមុនរហូតដល់ទៅជាង ២០ គីឡូនោះទេ សូម្បីតែការងារ ក៏តារាចម្រៀងស្រីរូបនេះ ទទួលបានភាពជោគជ័យខ្លាំងៗទៅ ខណៈមួយឆ្នាំចុងក្រោយនេះ រ័ត្ន រចនា មានឱកាសទៅសម្តែងនៅក្រៅប្រទេសជាញឹកញាប់ទៀតផង។
ជាការពិតណាស់ តារាចម្រៀង រ័ត្ន រចនា ធ្លាប់បានឱ្យដឹងដែរថា ទម្រាំតែមានថ្ងៃនេះ គឺនាងប្រឹងប្រែងតស៊ូតាំងពីនៅក្មេង ក៏ព្រោះតែជីវភាពខ្វះខាត តែដោយការតស៊ូមិនចុះចាញ់ទើបធ្វើឱ្យនាងមានថ្ងៃនេះ។
ជាក់ស្តែង ថ្មីៗនេះ ស្របពេលកំពុងសម្តែងនៅឯសហរដ្ឋអាមេរិក រ័ត្ន រចនា ត្រូវបានលោកគ្រូផ្នែកចម្រៀង និង តន្ត្រីជើងចាស់ លោក មិញ សុធីវណ្ណ បានបង្ហើបឱ្យដឹងពីការតស៊ូរបស់ រ័ត្ន រចនា លើវិថីសិល្បៈដែរ ដោយលោកគ្រូបានបង្ហោះសារមួយ បន្ទាប់ពីជួបកូនសិស្សរូបនេះ នៅសហរដ្ឋអាមេរិកថា៖ «ជួបកូនសិស្សដែលតស៊ូមករៀនតាំងពីអាយុ ៧ ឆ្នាំ»៕
