ក្នុងវិស័យម្ហូបអាហារនៅកម្ពុជា លោក សៅ សុភ័ក្ត្រ ត្រូវបានគេស្គាល់ ជាចុងភៅដែលមានជំនាញលើម្ហូបខ្មែរច្នៃប្រឌិត ឬម្ហូបបែបសហសម័យ ហើយតាមរយៈជំនាញនេះ លោកក៏រមែងធ្វើឱ្យកម្ពុជាល្បីល្បាញនៅលើឆាកអន្តរជាតិផងដែរ។ ជាក់ស្តែង កាលពីឆ្នាំ ២០២៤ លោកបានក្លាយជាអ្នកឈ្នះមួយរូប ក្នុងចំណោមអ្នកឈ្នះមួយចំនួនទៀត មកពីជុំវិញពិភពលោក នៅក្នុងកម្មវិធី BEST Master Chef 2024 Awards។ នេះមិនរាប់បញ្ចូលកម្មវិធីអន្តរជាតិជាច្រើនទៀត ដែលលោកបាននំាយកភាពជោគជ័យមកកាន់កម្ពុជា។
កាន់តែមោទកភាពទៀតនោះ ជាមួយភាពលេចធ្លោ និង ភាពច្នៃប្រឌិតខ្ពស់ ថ្មីៗនេះ ចុងភៅ សៅ សុភ័ក្រ ត្រូវបានក្រុមហ៊ុនពងត្រីល្បីល្បាញលំដាប់ពិភពលោក ជ្រើសរើសជាទូតសុច្ឆន្ទៈដំបូងគេប្រចាំតំបន់អាស៊ី។ ជាមួយអារម្មណ៍រំភើប លោកបានសរសេរបង្ហោះនៅលើគណនីហ្វេសប៊ុកដែរថា៖ «ខ្ញុំបាទ សៅ សុភ័ក្ត្រ ជាមេចុងភៅប្រចាំនៅ ភោជនីយដ្ឋាន Villa 5 Cuisine ពិតជាមានមោទកភាព និង កិត្តិយសខ្ពង់ខ្ពស់ ដែលបានក្រុមហ៊ុន Sturia Caviar Fraçais ដែលជាក្រុមហ៊ុនរបស់ប្រទេសបារាំង ដែលបាននាំចូលពងត្រីកាវីយ៉ា បានជ្រើសរើសរូបខ្ញុំ ជាចុងភៅម្នាក់ ហើយបានផ្តល់ឱកាសឱ្យរូបខ្ញុំធ្វើជា ទូតសុច្ឆន្ទៈដំបូងគេប្រចាំតំបន់អាស៊ី សម្រាប់ផលិតផលរបស់ក្រុមហ៊ុនបារាំង ប្រចាំប្រទេសកម្ពុជា»។
បើតាមក្រុមហ៊ុនពងត្រីខាងលើ ហេតុផលដែលសម្រេចជ្រើសរើសចុងភៅខ្មែរ ជាទូតសុច្ឆន្ទៈដំបូងគេប្រចាំនៅតំបន់អាស៊ី នេះក៏ព្រោះក្រុមហ៊ុនតែងតែឱ្យតម្លៃទៅលើចុងភៅ ដែលចូលចិត្តអភិវឌ្ឍន៍ម្ហូបជាតិសាសន៍របស់ខ្លួន ជាមួយចំណង់ចំណូលចិត្តប្លែក សាមញ្ញនិយម និង និរន្តរភាព។ ហើយ លោក សៅ សុភ័ក្ត្រ គឺជាមេចុងភៅម្នាក់ ដែលតែងតែចែករំលែកតម្លៃទាំងនេះ ជាមួយម្ហូបច្នៃប្រឌិតរបស់ខ្លួន។ ដូច្នេះហើយក្រុមហ៊ុនមិនរារែកឡើយក្នុងការតែងតាំងលោកជាទូតសុច្ឆន្ទៈដំបូងគេប្រចាំតំបន់អាស៊ី៕
