ថ្មីៗនេះ ព្រះអង្គម្ចាស់ Robert ជាសែរាជវង្សនៃប្រទេសលុចសំបួ បានទម្លាយពីការបាត់បង់ព្រះជន្មរបស់បុត្រាពៅមួយអង្គព្រះនាម Frederick ក្នុងវ័យទើប ២២ ឆ្នាំ ក្រោយពីទ្រង់ខិតខំតស៊ូជាមួយជំងឺកម្រម្យ៉ាងអស់រយៈពេលជាច្រើនឆ្នាំ។
តាមព័ត៌មានបានឱ្យដឹងថា ព្រះអង្គម្ចាស់ Frederick បានបាត់បង់ព្រះជន្មកាលពីថ្ងៃទី ១ ខែមីនា ឆ្នាំ ២០២៥ កន្លងទៅ ដោយសារតែជំងឺហ្សែនដ៏កម្រមួយ គឺជំងឺ POLG Mitochondrial Disease។ ជំងឺ POLG គឺជាជំងឺហ្សែនដ៏កម្រដែលបំផ្លាញថាមពលនៅក្នុងកោសិការបស់រាងកាយ វាធ្វើឱ្យសរីរាង្គទន់ខ្សោយបន្តិចម្តងៗ ដែលមានដូចជាខួរក្បាល ថ្លើម ពោះវៀន និង សាច់ដុំជាដើម។ ក្នុងនោះដែរ ព្រះអង្គម្ចាស់ Frederick បានកើតជំងឺនេះមកពីកំណើត ប៉ុន្តែគេទើបតែធ្វើរោគវិនិច្ឆ័យឃើញនៅពេលទ្រង់អាយុ ១៤ ឆ្នាំ ដែលកាលនោះស្ថានភាពជំងឹរបស់ទ្រង់ក៏យ៉ាប់យឺនណាស់ហើយ។
យ៉ាងណាមិញ ព្រះបិតា និង ព្រះមាតា ក៏ដូចជាម្ចាស់បងទាំង ២ អង្គរបស់ព្រះអង្គ Frederick ពិតជាមានការសោកស្តាយខ្លាំងណាស់ចំពោះការចាកចេញទៅរបស់ទ្រង់ លើសពីនេះទៅទៀត គឺមុននឹងចាកចេញទៅព្រះអង្គ Frederick ក៏ថែមទាំងបានផ្តែផ្តាំលាដល់សមាជិកគ្រួសារទាំងអស់ ដោយទ្រង់បានអរគុណដល់សមាជិកក្រុមគ្រួសារទាំងអស់ ដែលនៅក្បែរទ្រង់នាពេលកន្លងមក៕
ប្រភព៖ Sanook
