រយៈពេលច្រើនឆ្នាំមកហើយដែលលោក ងួន សុបិន បានប្រឡូកនៅក្នុងវិស័យសិល្បៈ ដោយដំបូងឡើយគេបានស្គាល់លោក គឺជាអ្នកនិពន្ធទំនុកភ្លេងមួយរូប ហើយក្រោយៗមក លោកបានវិវត្តន៍ខ្លួនទៅជាតារាចម្រៀង តារាសម្ដែងបែបកំប្លែង និង ជាពិធីករជាដើម។
ស្នាដៃបទចម្រៀងជាច្រើនដែលលោក ងួន សុបិន បានតែងនិពន្ធ និង បកស្រាយដោយសិល្បករល្បីៗដូចជាលោក កែវ វាសនា, លោក គូម៉ា និង តារាចម្រៀងជាច្រើន ហើយមកដល់ពេលនេះ ស្នាដៃរបស់លោកនៅតែទទួលបានការស្រឡាញ់គាំទ្រពីទស្សនិកជនដដែល។ មិនតែប៉ុណ្ណោះ ទន្ទឹមនឹងនោះ លោកក៏បាននិពន្ធ និង បកស្រាយបទចម្រៀងផ្ទាល់ខ្លួនផងដែរ។
ងាកមកការសម្ដែងវិញ កន្លងមកលោក ងួន សុបិន បានលេចក្នុងខ្សែភាពយន្តខ្នាតធំ និង វីដេអូជាច្រើន ដែលលោកតែងសម្ដែងជាអង្គបែបកំប្លែងៗ ធ្វើឱ្យទស្សនិកជនបានទស្សនាហើយពេញចិត្តជាមួយលោកជាខ្លាំង។ លើសពីនេះ បច្ចុប្បន្នលោកក៏ក្ដោបបានតំណែងជាតារាប្រចាំកម្មវិធីកម្សាន្តមួយរបស់ PNN ដែលធ្វើឱ្យទស្សនិកជនគ្រប់ស្រទាប់បានស្គាល់ពីសមត្ថភាពរបស់លោកលើវិស័យសិល្បៈ។
ជាមួយទេពកោសល្យផ្នែកសិល្បៈច្រើនជំនាញ ចំណេះដឹង និង ភាពកំប្លុកកំប្លែងមិនចេះរីងស្ងួតរបស់លោកនេះហើយ ធ្វើឱ្យតារាប្រុសរូបនេះ កាន់តែមានប្រជាប្រិយភាពពីទស្សនិកជនមិនជិនណាយ៕
