បច្ចុប្បន្នគេសង្កេតឃើញ ជំងឺ តម្រងនោម គឺជាជំងឺដ៏កាចសាហាវមួយក្នុងចំណោមជំងឺកាចសាហាវជាច្រើនទៀតដូចជាជំងឺមហារីក ជំងឺបេះដូង ដាច់សរសៃឈាមក្នុងខួរក្បាល ទឹកនោមផ្អែម និង ផ្សេងៗ ដែលវាកំពុងកើតមានលើប្រជាជនទូទាំងពិភពលោក។
តម្រងនោម គឺជាសរីរាង្គដ៏សំខាន់មួយដែលទទួលខុសត្រូវក្នុងការបញ្ចេញកាកសំណល់ និង រក្សាតុល្យភាពនៃទឹក និង អំបិលរ៉ែនៅក្នុងរាងកាយ។ ជាពិសេសជំងឺតម្រងនោមរ៉ាំរ៉ៃ មូលហេតុទូទៅបំផុតគឺជំងឺទឹកនោមផ្អែម និង សម្ពាធឈាមខ្ពស់។ ដូច្នេះហើយ ការថែរក្សាសុខភាពក្រលៀនរបស់អ្នកឱ្យនៅឆ្ងាយពីការខ្សោះជាតិទឹកជារឿងដែលមិនគួរធ្វេសប្រហែសឡើយ។
បើតាមប្រសាសន៍របស់ វេជ្ជបណ្ឌិត ហ៊ាង រតនា បានចែករំលែកនៅលើបណ្ដាញសង្គមកាលពីពេលកន្លងទៅអំពីការថែរក្សាតម្រងនោមឱ្យមានសុខភាពល្អ មានរឿងមួយចំនួនដែលយើងគួរ និង មិនគួរធ្វើដូចខាងក្រោម ៖
១. ញ៉ាំទឹកឱ្យបានគ្រប់គ្រាន់ទៅតាមអាយុ និង គីឡូជារៀងរាល់ថ្ងៃ
២. តមប្រៃ និង តមផ្អែម
៣. ហាមលេបថ្នាំ អាហារបំប៉ន ឱសថបុរាណ ថ្នាំខ្មែរ ថ្នាំចិនសែ…ផ្តេសផ្តាស
៤. ត្រួតពិនិត្យសុខភាពឱ្យបានទៀងទាត់ ជាពិសេសសុខភាពតម្រងនោម (urea, creatinine, creatinine clearance, urine test)
៥. តាមដានសម្ពាធឈាម និង ជាតិស្ករឱ្យបានទៀងទាត់៕
