តារាសម្ដែងស្រីដ៏ឆ្នើម អ្នកនាង លី ម៉ារីណា បានសម្រេចចិត្តលាឈ្មោះជាស្រ្តីមេម៉ាយ ហើយចាប់ផ្ដើមជីវិតអាពាហ៍ពិពាហ៍ជាថ្មីម្ដងទៀតនឹងស្វាមីរូបសង្ហា ដែលត្រូវបានមហាជនស្គាល់ច្បាស់ជាបុគ្គលមានតួនាទីក្នុងសង្គម គឺវរសេនីយ៍ឯក ទៀង ច័ន្ទសារ អធិការនគរបាលខណ្ឌដូនពេញ។
ចាប់តាំងពីភ្ជាប់ចំណងគ្រួសារជាមួយស្វាមីមក តារាសម្ដែងស្រីសាច់ចាំ អ្នកនាង លី ម៉ារីណា តែងទទួលបានការស្រឡាញ់ថ្នាក់ថ្នម ការមើលថែ និង យកចិត្តទុកដាក់ពីស្វាមីជានិច្ច ដោយជារឿយៗ អ្នកនាងក៏តែងបង្ហោះរូបភាពបង្ហាញពីសុភមង្គលក្នុងគ្រួសារនៅលើគណនីហ្វេសប៊ុក ធ្វើឱ្យមហាជនជាច្រើនលួចសរសើរពីក្ដីសុខរបស់អ្នកនាង។
យ៉ាងណាមិញ ដ្បិតថាស្វាមីអ្នកនាង លី ម៉ារីណា ជាមន្រ្តីមានតួនាទីក្នុងជួររាជរដ្ឋាភិបាលក៏ពិតមែន ប៉ុន្ដែតារាស្រីរូបនេះ ក្រៅពីបំពេញតួនាទីជាភរិយាល្អ រៀបចំផ្ទះសម្បែង ធ្វើម្ហូបជូនស្វាមីហើយនោះ អ្នកនាងក៏មានជំនួញផ្ទាល់ខ្លួនដែរ គឺការលក់ផលិតផលផ្នែកសម្ផស្ស និង សម្លៀកបំពាក់តាមអនឡាញ ជាដើម ហើយបច្ចុប្បន្នក៏កំពុងដំណើរការរលូន និង ទទួលបានអតិថិជនជាច្រើនហូរហែ។
មមាញឹកលើមុខជំនួញផង ថែមទាំងត្រូវបំពេញតួនាទីជាភរិយាល្អមើលថែក្រុមគ្រួសារទៀត តែអ្នកនាង លី ម៉ារីណា មិនបានដកខ្លួនចេញពីសិល្បៈទាំងស្រុងនោះទេ ដោយម្ដងម្កាលតារាស្រីរូបនេះ តែងបង្ហាញមុខក្នុងកម្មវិធីសិល្បៈនានា ឬខ្សែភាពយន្តភាគបែបសម័យ និង បុរាណជារឿយៗ៕
