មានករណីមួយនៅប្រទេសថៃ ដែលកំពុងតែធ្វើឱ្យមហាជនមានការហួសចិត្ត ដោយមានអ្នកគ្រូមួយរូបជេរស្តីសិស្សខ្លាំងៗ ដល់ថ្នាក់ដេញគ្នាឱ្យទៅលោតពីលើអគារ សិស្សទ្រាំមិនបានពួយលេបថ្នាំសម្លាប់ខ្លួន តែមិនបានសម្រេច។
តាមព័ត៌មានបានឱ្យដឹងថា ករណីមួយនេះបានកើតឡើងនៅមហាវិទ្យាល័យមួយកន្លែង នាខេត្តឡាំប៉ាង ដោយនៅថ្ងៃកើតហេតុគឺជាថ្ងៃប្រឡង គ្រូក៏បានចែកក្រដាសប្រឡងឱ្យសិស្សដោយអារម្មណ៍មិនសូវល្អ ដូចជាខឹងនឹងនរណាម្នាក់មកពីខាងក្រៅ។ ចំណែកនិស្សិតស្រីនោះ នាងឈឺដៃម្ខាងត្រូវរុំបង់ ប្រើបានតែដៃម្ខាងទៀត លុះពេលគ្រូចែកក្រដាសប្រឡងមក ខ្យល់ប៉ើងជ្រុះទៅដី នាងក៏ប្រញាប់ឱនរើស ដោយមិនបានលើកដៃសំពះអរគុណគ្រូ ដែលធ្វើឱ្យគ្រូខឹងនាងជាខ្លាំង ហើយក៏បានជេរស្តីនាងជាពាក្យពេចន៍ផ្សេងៗ រួមទាំងដេញឱ្យនាងទៅលោតពីលើអគារទៀតផង។
និស្សិតរូបនេះ មានការភិតភ័យ និង ឈឺចាប់មិនតិចឡើយ តែក៏ខំទ្រាំប្រឡងលុះចប់ រហូតដល់ម្តាយមកទទួលទៅផ្ទះវិញ។ លុះដល់ផ្ទះហើយ នាងក៏នៅតែខូចចិត្តជាមួយរឿងគ្រូស្តីឱ្យ ហើយក៏បានឆាតទៅប្រាប់ថាខ្លួនទ្រាំលែងបានហើយ រួចក៏លេបថ្នាំប៉ារ៉ាសេតាម៉ុលអស់មួយបន្ទះ។ មិត្តរបស់នាងក៏បានស្លន់ស្លោខលទៅប្រាប់ម្តាយរបស់នាង ទើបម្តាយបានដឹង និង ប្រញាប់បញ្ជូនកូនទៅមន្ទីរពេទ្យ។
យ៉ាងណាមិញ ស្រ្តីជាម្តាយពិតជាមានការខូចចិត្តចំពោះរឿងនេះខ្លាំងណាស់ ព្រោះកូនស្រីគឺជាក្មេងបាក់ទឹកចិត្តស្រាប់ទៅហើយ មិនគួរណាគ្រូមកស្តីបន្ទោសនាងបែបនេះទៀតឡើយ៕
ប្រភព៖ Khaosod
