បន្ទាប់ពីការប្រឹងប្រែង អស់ជាច្រើនតំណាក់កាល រហូតបានក្លាយទៅជាម្ចាស់ជ័យលាភីកម្មវិធីប្រកួតចម្រៀងរ៉េប Rapper Fighter រដូវកាលទី ១ ហើយនោះ OG Golden ត្រូវបានមហាជន ជាពិសេស អ្នកស្នេហាវិស័យរ៉េបកាន់តែចាប់ក្រសែភ្នែកទៅកាន់លោកកាន់តែខ្លាំង។
តួយ៉ាង ដោយក្តីស្រឡាញ់ ការប្រឹងប្រែងលើវិស័យរ៉េបនេះ OG Golden បានអភិវឌ្ឍន៍ខ្លួនឯងពីយុវជនមានអាជីពជាអ្នកដឹកម្ហូប ក្លាយទៅជា Rap Star ដែលកំពុងបោះជំហានលើក្តីស្រមៃរបស់ខ្លួន។
ងាកទៅកាន់ជីវិតឯកជន ពាក់ព័ន្ធនឹងរឿងបេះដូងឯណោះវិញ ស្របពេលកំពុងប្រកួត មហាជនអ្នកគាំទ្រ មានការសង្ស័យនូវទំនាក់ទំនងរបស់ OG Golden និង តារាស្រីវ័យក្មេង ជា វណ្ណពុទ្ធាលី ហៅ ជូលី ហាក់មានភាពស្និទ្ធស្នាលខ្លាំង។
ក្នុងនោះ អ្នកគាំទ្របានដាក់ការសង្ស័យថា តារាចម្រៀងរ៉េបប្រុសវ័យក្មេង OG Golden និង តារាសម្តែងស្រីវ័យក្មេង ជូលី គឺជាសង្សារនឹងគ្នា ខណៈថ្មីៗកន្លងទៅ OG Golden បានបង្ហោះរូប ជូលី លើ Story fb និង គូររូបបេះដូងជាសញ្ញាទៀតផង។ ម្យ៉ាងវិញទៀត ក្នុងថ្ងៃប្រកួតវគ្គផ្តាច់ព្រ័ត្រ Rapper Fighter តារាសម្តែងស្រី ជូលី បានទៅលើកទឹកចិត្ត OG Golden នៅក្រោយឆាកផ្ទាល់ទៀតផង។
ដោយឡែក ក្រោយពីផ្ទុះការសង្ស័យហើយនោះ ពេលនេះសាមីខ្លួនម្នាក់ៗ ក៏មិនបានលាក់បាំងទៀតនោះដែរ ដោយគេឃើញកាលពីថ្ងៃបុណ្យនៃក្តីស្រឡាញ់ កញ្ញា ជូលី បានទិញកាដូគូស្នេហ៍ឱ្យ OG Golden ដែលជាខ្សែដៃ និង ចិញ្ចៀនគូមានឈ្មោះពួកគេទាំងពីរទៀតផង។ លើសពីនោះ ក្រឡេកទៅមើលគណនី Tik Tok របស់ខាងប្រុសវិញ ពោលគឺលោក OG Golden ក៏បានបង្ហោះវីដេអូ បង្ហាញរូបភាពគូយ៉ាងផ្អែមល្ហែមជាសាធារណៈ ក្នុងន័យបង្ហាញថា ធ្វើឱ្យអ្នកគាំទ្រកាន់តែកាត់ន័យយល់ថា អ្នកទាំងពីរពិតជាគូស្នេហ៍នឹងគ្នាមែន៕
