និយាយពីជីវិតឯកជនរបស់តារាស្រីរូបស្រស់ សុខ សោម៉ាវត្តី មហាជនអ្នកគាំទ្របានជ្រាបហើយ ក្រោយពីជួបរឿងខកបំណងលើជីវិតស្នេហាម្ដងហើយម្ដងទៀត ប៉ុន្មានឆ្នាំមកនេះ គេឃើញថាតារាស្រីរូបនេះ មិនខ្វល់ខ្វាយរកអ្នកស្អំបេះដូងថ្មីទៀតឡើយ ដោយបន្តស្ពាយឈ្មោះជាអ្នកមេម៉ាយដ៏រឹងមាំចិញ្ចឹមកូនស្រីបណ្ដូលចិត្តតែម្នាក់ឯង។
បើចាប់អារម្មណ៍ពីកូនស្រីបណ្ដូលចិត្តរបស់តារាស្រីរូបនេះ មកដល់ពេលនេះកាន់តែធំពេញរូបពេញរាង មានរូបសម្រស់ និង ទម្រង់មុខស្រស់ស្អាតកាត់តាមអ្នកម៉ាក់ខ្លាំង ដែលមហាជនតែងសរសើរថាមុខមាត់នាងដូចអ្នកម្ដាយបេះដាក់ ជាពិសេសចរិតក្រមិចក្រមើមគួរឱ្យស្រឡាញ់ខ្លាំងទៀតផង។
ស្របពេលកូនស្រីធំពេញវ័យនេះដែរ តារាស្រីរូបនេះ កាន់តែលែងខ្វល់ចង់សាងគូជីវិតថ្មី ដោយផ្ដោតតែលើការងាររកស៊ីចិញ្ចឹមកូនស្រី និង មើលថែខ្លួនស្រស់ស្អាតខ្ញង់ឡើង។ ជាក់ស្ដែង ថ្មីៗនេះ អ្នកម្ដាយរូបស្រស់ សុខ សោម៉ាវត្តី ហាក់កាន់តែមានក្ដីសុខពេញលេញក្នុងជីវិត ដែលនាងយល់ថាមានកូនស្រីបណ្ដូលចិត្តរូបនេះតែម្នាក់គឺគ្រប់គ្រាន់ ដែលខ្លួនជាប៉ាផង ជាម៉ាក់ផង រីឯកូនស្រីប្រៀបដូចជាមិត្តផង។
ក្នុងនោះ សុខ សោម៉ាវត្តី បានបង្ហោះរូបភាពជាគូនឹងកូនស្រីភ្ជាប់ជាមួយសាររៀបរាប់លើហ្វេសប៊ុកថា ៖ «ស្នាមញញឹម ដែលស្រស់ស្អាតបំផុតរបស់ម៉ាក់ គឺស្នាមញញឹមដ៏បរិសុទ្ធរបស់កូនស្រីម្នាក់នេះ នាងធំទៀតហើយ នេះជាអនុស្សាវរីយ៍សំខាន់ៗដែលយើងត្រូវសាងរួមគ្នា ជាម៉ាក់ផង ជាប៉ាផង ជាមិត្តភក្តិផង មានអីមិនល្អឥឡូវកូនជិតក្លាយជាមិត្តភក្តិមែនទែនហើយ»៕
