Lee Min Ho បដិសេធមិនធ្លាប់ពាក់ព័ន្ធនឹង Park Bom ក្រោយនាងចេះតែផុសហៅលោកថាប្តីៗ និង អះអាងថាជារឿងពិត

ថ្មីៗនេះ ចចាមអារ៉ាមរឿងទំនាក់រវាងតារាប្រុស Lee Min Ho និង តារាស្រី Park Bom បានផ្ទុះក្តៅគគុក ក្រោយពី តែងតែផុសរឿងប្លែកៗនៅតាមបណ្តាញសង្គម និងហៅ Lee Min Ho ថាប្តីៗពេញមាត់។

តាមព័ត៌មានបានឱ្យដឹងថា ចចាមអារ៉ាមនេះបានផ្ទុះឡើងតាំងពីខែកញ្ញា ឆ្នាំ ២០២៤ កន្លងទៅ ក្រោយពីតារាស្រី Park Bom បានផុសរូបរបស់ Lee Min Ho ហើយបានហៅលោកថាប្តី។ លុះមកដល់ថ្ងៃទី ១៥ ខែកុម្ភៈ ឆ្នាំ ២០២៥ Park Bom ក៏បានផុសឱ្យដឹងទៀតថា រឿងនេះគឺជារឿងពិត ហើយនាងក៏ចេះតែផុសពីរឿងរបស់ Lee Min Ho ជារឿយៗ ដែលធ្វើចចាមអារ៉ាមក៏កាន់តែផ្ទុះឡើង។

យ៉ាងណាមិញ កាលពីថ្ងៃទី ២០ ខែកុម្ភៈ ឆ្នាំ ២០២៥ កន្លងទៅនេះ ខាងផលិតកម្ម MYM ដែលជាទ្រនំរបស់ Lee Min Ho បានចេញមុខឱ្យដឹងថា លោកគ្មានទំនាក់ទំនងផ្ទាល់ខ្លួនអ្វីជាមួយនឹង Park Bom ឡើយ លោកមិនដែលស្គាល់នាងសូម្បីតែនៅក្រៅ ដូចនេះពាក្យចចាមអារ៉ាមនេះជារឿងមិនពិតនោះទេ។ ដោយឡែក អ្នកតំណាងរបស់ Park Bom បានឱ្យដឹងថាមួយរយៈក្រោយនេះ នាងមើលរឿង The Heirs ដែលមាន Lee Min Ho ជាតួសម្តែង ដូចនេះហើយប្រហែលជានាងស្រឡាញ់ចូលចិត្តលោកខ្លាំង ហើយនាងគ្មានបំណងអ្វីមិនល្អចំពោះលោកឡើយ៕

ប្រភព៖ Pinkvilla