1883 Magazine គឺជាទស្សនាវដ្តីបោះពុម្ព និង អនឡាញ ដ៏មានប្រជាប្រិយភាពមួយរបស់អង់គ្លេស ដែលមានដើមកំណើតតាំងពីឆ្នាំ ២០១០ នៅភាគខាងលិចទីក្រុងឡុងដ៍ ចក្រភពអង់គ្លេស។ ទស្សនាវដ្តីនេះ មាតិកាផ្តោតបង្ហាញពីអ្វីដែលថ្មី និង រំភើបនៅក្នុងពិភពហ្វេហ្សិន តន្ត្រី ភាពយន្ត និង សិល្បៈជាដើម។ យ៉ាងណាមិញ ជាមោទកភាពមួយសម្រាប់កម្ពុជា ដែលថ្មីៗនេះ ទស្សនាវដ្តី 1883 Magazine បានថតម៉ូដ បង្ហាញនូវគ្រឿងអលង្ការដ៏ទំនើប ដែលជាអលង្ការរំលេចក្បាច់ខ្មែរយ៉ាងទាក់ទាញ។
ជាក់ស្តែង តាមរយៈគេហទំព័រផ្លូវការរបស់ទស្សនាវដ្តី 1883 Magazine អលង្ការរំលេចក្បាច់ខ្មែរ ត្រូវបានថតក្នុងខនសិបចំណងជើង Gilded Allure បង្ហាញម៉ូដដោយម៉ូឌែលខ្មែរ-អាមេរិក នាង alissa.iris និង ថតដោយអ្នកថតរូបហ្វេហ្សិនដ៏ល្បីមកពីទីក្រុងញ៉ូវយកគឺ លោក Steve Reganato។ អលង្ការបំពាក់តុបតែងលើខ្លួនមានដូចជា ក្រវិលផ្ការំដួល ចនត្រចៀក ខ្សែកផ្កាម្លិះ ចិញ្ចៀន និង កងដៃផ្សេងៗរំលេចក្បាច់ខ្មែរ គឺជាគ្រឿងពីម៉ាក Edoeyen ដែលគេស្គាល់ជាម៉ាកគ្រឿងអលង្ការប្រណីត បង្កើតឡើងដោយកូនខ្មែរនៅអាមេរិក។
ក្រោយការចេញផ្សាយនៅលើអនឡាញ ឃើញថាបរទេសជាច្រើនកំពុងផ្ទុះការចាប់អារម្មណ៍ ជាពិសេសនៅលើទំព័រ Instagram របស់ទស្សនាវដ្តីនេះ ក៏មានអ្នកចូលខមមិន ពាក្យថា ពិតជាស្រលាញ់ មើលមកពិតជាអស្ចារ្យ និង អេឡេហ្គង់បំផុត។ គួរឱ្យដឹងដែរថា គ្រឿងអលង្ការម៉ាក Edoeyen ត្រូវបានបង្កើតឡើងដោយកូនខ្មែរពីររូប ជាបងប្អូនបង្កើតនឹងគ្នា ម្នាក់ឈ្មោះ អ៊ីដូ ចម (Edo Chorm) ជាបងស្រី និង ម្នាក់ទៀតឈ្មោះ អ៊ីយេន ចម (Eyen Chorm) ជាប្អូនស្រី។ អ្នកទាំងពីរចាប់កំណើត និង ធំធាត់នៅតំបន់ប្រ៊ូឃ្លីននៃទីក្រុងញូវយកសហរដ្ឋអាមេរិក។ បច្ចុប្បន្ន ម៉ាកគ្រឿងអលង្ការនេះកំពុងមានទីផ្សារ និង ទទួលបានការចាប់អារម្មណ៍គួរឱ្យកត់សម្គាល់នៅឯបរទេស៕
