មហាជននិយមតាមដានវិស័យបវរកញ្ញា ច្បាស់បានស្គាល់មកហើយ កញ្ញា សារុំ ចន្ថា បេក្ខភាព Miss Cosmo Cambodia 2025 ដែលកំពុងតែបន្តដំណើរ បំពេញក្តីស្រមៃរបស់ខ្លួនក្នុងវិស័យមួយនេះ។
ជាការពិតណាស់ មុននឹងចូលរួមប្រកួត ក្លាយទៅជាបេក្ខភាព Miss Cosmo Cambodia ឆ្នាំ ២០២៥ នេះ កញ្ញា សារុំ ចន្ថា ក៏ទទួលបានតំណែងចំនួន ២ មកហើយដែរ ក្នុងវិស័យប្រកួតបវរកញ្ញា ដោយនាង គឺជា 2nd Runner Up Miss Grand 2020 Cambodia និង ជា 2nd Runner Up Miss Global Cambodia 2024។
ក្នុងនោះ គេចាំបានថា អំឡុងពេលឈ្នះតំណែង 2nd Runner Up Miss Global Cambodia 2024 សារុំ ចន្ថា បានបោះបង់ឱកាសក្លាយទៅជា Miss Tourism Cambodia 2024 តំណាងកម្ពុជាប្រកួតលើឆាកអន្តរជាតិ នាប្រទេសម៉ាឡេស៊ី ក៏ព្រោះតែពេលវេលាប្រថុចញ៉ុចពេក មិនអាចឱ្យនាងរៀបចំខ្លួនទាន់ពេលវេលា។
ដោយឡែក ងាកត្រឡប់ទៅក្រោយបន្តិចទម្រាំមានថ្ងៃនេះ កញ្ញា សារុំ ចន្ថា បានឱ្យដឹងថា នាងធ្លាប់ចូលរួមក្នុងការប្រកួតសម្រស់មួយនៅអាយុ ១៧ ឆ្នាំ ដោយនៅពេលនោះ នាងប្រឈមមុខនឹងការរិះគន់ និង ការវាយតម្លៃពីមនុស្សជុំវិញខ្លួន ប៉ុន្តែនាងមិនដែលអនុញ្ញាតឱ្យភាពអវិជ្ជមានទាំងនោះធ្វើឱ្យនាងបរាជ័យឡើយ។ សារុំ ចន្ថា បានបន្តទៅមុខយ៉ាងរឹងមាំ ហើយក៏បានឈានដល់ចំណាត់ថ្នាក់ល្អជាមួយសមត្ថភាពរបស់នាងដោយជោគជ័យ និង ត្រូវបានក្លាយទៅជាបវរកញ្ញាមួយរូប ទទួលបានការសរសើរពីភាពតស៊ូ និង ការប្រឹងប្រែងរបស់នាងលើវិស័យមួយនេះ៕
