និយាយពីរឿងរ៉ាវជីវិតសិល្បៈរបស់តារាចម្រៀងស្រីល្បីឈ្មោះ វ៉ាន់ នីឡា មកដល់ពេលនេះ រយៈពេលជិត ៤ ឆ្នាំមកហើយ ដែលតារាចម្រៀងរូបនេះ បានវិលចូលសិល្បៈពេញទំហឹងវិញ ក្រោយពីបាត់មុខអស់ជាច្រើនឆ្នាំ។
ក្រោយពីវិលចូលសិល្បៈពេញលេញវិញ តារាសម្ដែងស្រីរូបនេះ បានសាងប្រជាប្រិយភាពជាថ្មីលើស្នាដៃចម្រៀងរបស់នាង ដែលក៏ទទួលបានទីផ្សារសិល្បៈជាបន្តបន្ទាប់វិញ ទាំងលើឆាកប្រគុំតន្រ្តីកម្មវិធីតូចធំជាច្រើន ព្រមទាំងបានក្លាយជាពិធីការិនីក្នុងកម្មវិធីផ្សេងៗទៀតផង។
ដោយឡែក ដ្បិតតែបានបន្តក្ដីស្រមៃលើវិថីនេះវិញមែន ប៉ុន្តែបច្ចុប្បន្នតារាចម្រៀងស្រីរូបនេះ ក៏ហាក់នៅមិនទាន់ពេញចិត្តចំពោះការខំប្រឹងប្រែងរបស់ខ្លួន ខណៈនាងនៅមិនទាន់ទទួលបានជោគជ័យលើសិល្បៈមានកេរ្តិ៍ឈ្មោះដូចពីមុនវិញឡើយ។
ជាក់ស្ដែង ថ្មីៗនេះ វ៉ាន់ នីឡា បានធ្វើឱ្យមហាជនអ្នកគាំទ្រចាប់អារម្មណ៍ខ្លាំង ក្រោយពីបានឃើញនាងនិយាយក្នុងកម្មវិធីមួយទាំងរំជួលចិត្តទប់អារម្មណ៍មិនបាន ទ្រហ៊ោយំខ្លាំងៗ ដោយបានរៀបរាប់ដឹងខ្លួនបានសាងកំហុសច្រើន មិនថាក្នុងវិស័យសិល្បៈ និង ក្នុងគ្រួសារ ប៉ុន្តែនៅតែមានអ្នកយោគយល់ឱ្យនាងបាន ជាពិសេសអ្នកគាំទ្រទោះពេលនេះ នាងមិនល្បី មិនសូវមានឈ្មោះដូចមុន ក៏នៅតែបន្តគាំទ្រលើកទឹកចិត្តនាងរហូត ដែលជាកម្លាំងចិត្តឱ្យនាងស៊ូបន្តលើវិស័យនេះ៕
