វ័យទើបតែ ២៣ ឆ្នាំ លោក គួច វរ្ម័ន គឺជានាយកប្រតិបត្តិនៃក្រុមហ៊ុន Future Focus Solutions & Pharma Co.,Ltd ជាក្រុមហ៊ុនផ្គត់ផ្គង់សម្ភារពេទ្យ និង ផលិតផលឱសថ។ លោកបានបញ្ចប់ការសិក្សាផ្នែកនយោបាយ និង ទំនាក់ទំនងអន្តរជាតិ នៅសាកលវិទ្យាល័យ Queen Mary ទីក្រុងឡុងដ៍។ ហាក់ដូចលឿនរហ័ស ថ្មីថ្មោងនេះ លោកបានសម្រេចចិត្តចាប់ផ្តើមជីវិតគូ ដោយបង្ហាញមុខគូដណ្តឹងច្បាស់ៗ មានចាស់ទុំដឹងឮសងខាង ដោយបានធ្វើពិធីភ្ជាប់ពាក្យកាលពីថ្ងៃទី ៩ ខែ កុម្ភៈ ឆ្នាំ ២០២៥ នៅទីតាំងសណ្ឋាគារប្រណីតមួយកន្លែងក្នុងទីក្រុងភ្នំពេញ។
តាមរយៈរូបភាពច្រើនសន្លឹក ដែលបង្ហោះដោយក្រុមថតរូប Artist Photography ឃើញថាកម្មវិធីភ្ជាប់ពាក្យ ឬ ពិធីពិសាស្លាដក់កន្សែង បានរៀបចំឡើងជាលក្ខណៈគ្រួសារ។ គូដណ្តឹងរបស់ លោក គួច វរ្ម័ន មាននាម ឈុនប៊ុនថា អេលីហ្សា នាងពិតជាស្រស់ស្អាត ស្នាមញញឹមប្រកបដោយមន្តស្នេហ៍ ស័ក្តិសមបំផុតជាគូអនាគតនឹងលោក។
គួរឱ្យដឹងដែរ លោក គួច វរ្ម័ន ក៏ជាសហស្ថាបនិក UpNext ជាគេហទំព័រផ្សព្វផ្សាយ និង ជាស្ថាប័នផ្តោតទៅលើការធ្វើបដិវត្តកីឡា និង ផ្តល់ឱកាសអាជីពកីឡាសម្រាប់យុវជនកម្ពុជា។ ហើយលោកក៏ជាសហស្ថាបនិក Gymworks ផ្តោតទៅលើសម្លៀកបំពាក់កីឡាគុណភាពខ្ពស់ និង ផលិតផលប្រើប្រាស់ក្នុងជីវិតប្រចាំថ្ងៃ។ ជាសហគ្រិនវ័យក្មេងដ៏មានថាមពល កន្លងមកលោកត្រូវបានជ្រើសរើសជាបុគ្គលមួយរូបនៅក្នុងកម្មវិធី «Prestige 40 under 40» ជាគម្រោងមួយរបស់ទស្សនាវដ្តីអន្តរជាតិ Prestige ដែលផ្តោតលើបុគ្គល ៤០ នាក់អាយុក្រោម ៤០ ឆ្នាំ ដែលមានសមត្ថភាពខ្ពស់ ស្នាដៃល្អនៅក្នុងអាជីព និង មានឥទ្ធិពលទាំងក្នុងប្រទេស និង បណ្តាប្រទេសមួយចំនួននៅក្នុងតំបន់អាស៊ី៕
