កាលពីថ្ងៃទី ១៧ ខែកញ្ញា ឆ្នាំ ២០២៥ កន្លងទៅ ក្រុមទាហានថៃបន្តរាយបន្លាលួសជារំលោភយកដីខ្មែរជាថ្មីម្តងទៀតនៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។
យ៉ាងណាមិញ ខាងភាគីថៃ ពិតជាខឹងសម្បាណាស់ចំពោះការប្រឆាំងតវ៉ារបស់ប្រជាជនខ្មែរ ដែលរារាំងការរាយបន្លាលួសរបស់ខ្លួន ដោយជាក់ស្តែងក្រុមកងកម្លាំងថៃជាច្រើនត្រូវបានបញ្ជូនមកកាន់ភូមិព្រៃចាន់ ដើម្បីតទល់នឹងប្រជាជនខ្មែរដែលកំពុងតស៊ូការពារទឹកដី ហើយក្នុងនោះក្រុមកងកម្លាំងទាំងនេះបានប្រព្រឹត្តអំពើហិង្សារមកកាន់ប្រជាជនខ្មែរគ្រប់រូបភាព មានទាំងការបាច់គ្រាប់កាំភ្លើងជ័រ គ្រាប់បែកឧស្ម័ន និងឧបករណ៍បំពងសំឡេង ដែលធ្វើឱ្យប្រជាជនខ្មែររបួសជាច្រើននាក់។
ដោយឡែក ទាក់ទងនឹងករណីនេះ ខាងកងទ័ពភូមិភាគ ១ បានចេញសារព្រមានមួយដោយមិនចេះអៀនមាត់មកកាន់ប្រជាជនខ្មែរថា ប្រទេសថៃនឹងលែងធ្វើជាមនុស្សចិត្តល្អទៀតហើយ ថៃនឹងចាត់វិធានការកាន់តែតឹងរ៉ឹង នឹងមិនអត់ឱនឱ្យការបង្កហេតុណាមួយឡើយ បើសិនជារំលោភវិធានការ ប្រជាជនខ្មែរនឹងត្រូវចាប់ខ្លួនដាក់ក្នុងឡានអ្នកទោសភ្លាមៗ ហើយនឹងបញ្ជូនទៅកាត់ទោសនៅក្នុងប្រទេសថៃដោយច្បាប់ខ្ពស់បំផុត នេះគឺព្រោះប្រជាជនខ្មែរទន្ទ្រាន និងរំលោភលើអធិបតេយ្យភាពថៃយ៉ាងច្បាស់លាស់៕
