នៅថ្ងៃទី ១៨ ខែមេសា ឆ្នាំ ២០២៥ កន្លងទៅ នាវេលាម៉ោងប្រមាណ ១២ និង ៣០ នាទីថ្ងៃត្រង់ មានករណីប្តីប្រពន្ធ ១ គូ បានបបួលគ្នាទៅលោតទឹកសម្លាប់ខ្លួន ពីលើស្ពានជ្រោយចង្វារ តែសំណាងល្អក៏ត្រូវបានបងប្អូនជនជាតិខ្មែរឥស្លាម ចេញទូកនេសាទជួយសង្គ្រោះទាន់ពេលវេលា នៅចំណុចស្ពានជ្រោយចង្វារ សង្កាត់ស្រះចក ខណ្ឌដូនពេញ រាជធានីភ្នំពេញ។
ចំពោះមូលហេតុដែលនាំឱ្យប្ដីប្រពន្ធខាងលើគិតខ្លីបែបនេះ តាមរយៈការផ្ដល់សម្ភាសក្នុងសារព័ត៌មាន TVFB បុរសជាប្ដីដែលមានសភាពរបួសដៃ បានរៀបរាប់ថាខ្លួនបានដួលម៉ូតូរបួសដៃនៅផ្ទះ ហើយមិត្តភក្តិរបស់គេបានហៅប្រពន្ធខ្លួនឱ្យទៅធ្វើម្ហូបឱ្យ និង បានបើកសំឡេងបាសឮៗរួចបានធ្វើសកម្មភាពរំលោភប្រពន្ធរបស់ខ្លួនតែម្ដង។ ដោយក្ដីខកបំណងនឹងគ្មានលុយឱ្យថ្លៃព្យាបាលដៃ និង គ្រួសារជួបបញ្ហាបែបនេះ ទើបធ្វើឱ្យប្ដីប្រពន្ធមួយគូនេះ ដឹកដៃគ្នាទៅបញ្ចប់ជីវិតនៅស្ពានជ្រោយចង្វារ តែត្រូវបងប្អូនជនជាតិខ្មែរឥស្លាមសង្គ្រោះទាន់ពេល។
ចំពោះករណីនេះ នៅថ្ងៃទី ២០ ខែមេសា ឆ្នាំ ២០២៥ តាមរយៈគណនីដែលមានឈ្មោះ ឈុន សូវៀត បានបង្ហោះរូបភាព និង បានបញ្ជាក់ឱ្យបានដឹងថា បច្ចុប្បន្នកម្លាំងសមត្ថមិច្ចបានចាប់ខ្លួនជនសង្ស័យបានហើយ ពាក់ព័ន្ធនឹងការចាប់រំលោភប្រពន្ធគេ ធ្វើឱ្យជនរងគ្រោះ ២ នាក់ប្តីប្រពន្ធ តូចចិត្តនាំគ្នាទៅលោតទឹក នៅលើស្ពានជ្រោយចង្វារ៕
