នៅលើបណ្ដាញសង្គមកម្ពុជា កំពុងបន្តរួបរួមគ្នាចែករំលែកតតាំងនឹងការឈ្លានពាន ជាពិសេសជុំវិញរឿងប្រទេសថៃបំភ្លៃនូវការពិត និង លាបពណ៌មកលើកម្ពុជា ដែលមហាជន អ្នកសិល្បៈ និង បុគ្គលល្បីៗទាំងក្នុង និង ក្រៅប្រទេស បានចែករំលែកនិយាយអ្វីដែលជាការពិតពីកម្ពុជាទៅកាន់ពិភពលោកឱ្យបានដឹង ដើម្បីជួយរកយុត្តិធម៌ សន្តិភាព និង ភាពស្អាតស្អំសម្រាប់កម្ពុជាវិញ។
ស្របពេលនេះដែរ ក្រឡេកមើលហ្វេសប៊ុកផេករបស់ព្រះនាងតូច នរោត្តម ជេនណា ដែលព្រះនាង ក៏កំពុងប្រើសំឡេងរបស់ទ្រង់ រៀបរាប់ទៅកាន់ពិភពលោកឱ្យបានដឹងពីភាពស្អាតស្អំរបស់កម្ពុជា ជុំវិញរឿងរ៉ាវនៃការឈ្លានពានរបស់ប្រទេសថៃមកលើកម្ពុជា ដែលព្រះនាងបាននិយាយជា ៤ ភាសា មានភាសាខ្មែរ អង់គ្លេស ចិន និង បារាំង ក្នុងអត្ថន័យទាមទារសុខសន្តិភាព និង យុត្តិធម៌ ដោយស្មារតីការពារប្រជាជាតិខ្មែរ។
លើសពីនេះ ព្រះនាងតូច នរោត្តម ជេនណា ក៏បានសរសេររៀបរាប់ជាមួយនឹងវីដេអូបន្ថែមថា ៖ «កម្ពុជា» មិនទទួលបានផលប្រយោជន៍អ្វីសោះឡើយ ពីជម្លោះព្រំដែននេះ មិនថាជាដីធ្លី ឬ អំណាច តែបែរជាមានតែសេចក្តីទុក្ខព្រួយ ព្រោះសង្គ្រាមលើកនេះបណ្ដាលឱ្យបាត់បង់អាយុជីវិតកងទ័ព ប្រជាជនស្លូតត្រង់ បំផ្លាញទ្រព្យសម្បត្តិ ហេដ្ឋារចនាសម្ព័ន្ធ សម្បត្តិមរតកដូនតា បន្សល់ទុកនូវស្ត្រីមេម៉ាយ កុមារកំព្រា ជនពិការ ផ្ទះសម្បែងដែលត្រូវបានកម្ទេចខ្ទេចខ្ទី និង ប្រជាជនរត់ភៀសសឹកសង្គ្រាមរាប់សិបម៉ឺននាក់ គ្មានការងារធ្វើ ព្រមទាំងអាក់ខានពុំបានសិក្សារៀនសូត្រ កម្ពុជាគ្មានមូលហេតុអ្វី ក្នុងការចាប់ផ្ដើមសង្គ្រាមតាមការចោទប្រកាន់នេះឡើយ។
សូមពុកម៉ែបងប្អូននៅតែបន្តស្មារតីស្នេហាជាតិ និងសាមគ្គីភាពជាគ្រួសារតែមួយ ព្រមទាំងបន្តជឿទុកចិត្តចំពោះ ប្រមុខរាជរដ្ឋាភិបាលកម្ពុជា លើយុទ្ធសាស្ត្រក្នុងការដឹកនាំប្រទេសប្រកបដោយភាពឈ្លាសវៃ ដែលនឹងអាចស្ដារបានឡើងវិញ នូវសេចក្ដីសុខសន្តិភាពពេញលេញជូនប្រជាជាតិខ្មែរ។ ខ្ញុំសង្ឃឹមយ៉ាងមុតមាំថា វីដេអូនេះនឹងជួយនាំជាសារសំឡេងទៅកាន់ពិភពលោកឱ្យបានដឹង អំពីគោលជំហររបស់ប្រទេសកម្ពុជាឱ្យកាន់តែច្បាស់»៕
សូមចុចទីនេះដើម្បីទស្សនាវីដេអូ៖
