ខកចិត្តរឿងស្នេហាច្រើនលើកពេក ស្រ្តីម្នាក់សម្រេចជះលុយដាក់រូបខ្លួនឯងលើផ្ទាំងប៉ាណូ ប្រកាសរកបុរសម្នាក់ធ្វើប្ដី

ហេតុតែជួបស្នេហាខកចិត្តច្រើនលើក ស្ត្រីម្នាក់ឈ្មោះ Lisa Catalano មកពីទីក្រុង San Mateo រដ្ឋកាលីហ្វ័រញ៉ា បានសម្រេចចិត្តជះលុយជួលផ្ទាំងប៉ាណូ ដាក់រូបខ្លួនឯង ប្រកាសរកបុរសម្នាក់ធ្វើជាដៃគូជីវិត។

ស្ត្រីវ័យ ៤២ ឆ្នាំរូបនេះ បានដាក់ផ្សព្វផ្សាយរូបខ្លួន​ឯងនៅលើផ្ទាំងប៉ាណូ តាំងពីថ្ងៃទី ២ ខែ កញ្ញាមក បើគិតសរុបថ្លៃជួល គឺមិនតិចនោះឡើយ ដោយសារទីតាំងពាណិជ្ជកម្ម ស្ថិតនៅកន្លែងត្រូវប៉ាន់ ត្រង់ផ្លូវល្បឿនលឿន Highway 101 ក្នុងរដ្ឋកាលីហ្វ័រញ៉ា។

បើតាមបទសម្ភាសជាមួយសារព័ត៌មានបរទេស The Post ហេតុផលដែលនាងធ្វើដូច្នេះ ក៏ព្រោះតែនាងចង់បានស្វាមីច្បាស់លាស់ បន្ទាប់ពីនាងបរាជ័យស្នេហាជាច្រើនលើក និង ការទាក់ទងតាម app ស្វែងរកដៃគូនៅលើទូរស័ព្ទមិនបានផល។ អមជាមួយរូបខ្លួន​ឯងនៅលើផ្ទាំងប៉ាណូដ៏ធំ នាងបានដាក់អាសយដ្ឋានវេបសាយផ្ទាល់ខ្លួន MarryLisa.com ដើម្បីឱ្យអ្នកជិះតាមផ្លូវបានឃើញ និង ងាយស្រួលទាក់ទងផងដែរ។

ចំពោះបុរសដែលនាងប្រាថ្នា គឺសាមញ្ញបំផុតអាយុចាប់ពី ៣៥ ឆ្នាំ ដល់ ៤៥ ឆ្នាំ ជាបុរសមានជំនឿសាសនា, គំនិតនយោបាយ និង របៀបរស់នៅផ្តោតលើសុខភាពសមស្របនឹងនាង។ ឬបើអាច ត្រឹមប្រហាក់ប្រហែលតារាសំណព្វចិត្ត គឺតារាសម្តែងអាមេរិក David Duchovn បានហើយ៕

ប្រភព៖ NYP