ជុំវិញស្ថានភាពនៃការព្យាបាលជំងឺរបស់កុមារា ឆលី មកដល់រសៀលថ្ងៃទី ១៧ ខែមិថុនា ឆ្នាំ ២០២៥ នេះ មហាជនលើហ្វេសប៊ុកមានការចែករំលែកដោយក្ដីរំជួលចិត្តអាណិតកុមារា ឆលី ជាខ្លាំង ក្រោយពីបានទទួលដំណឹងថាពេលនេះ ឆលី មិនអាចបន្តព្យាបាលបានទៀតទេ ដោយគ្រាន់តែអាចប្រើថ្នាំដើម្បីរក្សាពេលវេលាមួយរយៈពេលប៉ុណ្ណោះ។
នេះបើតាមរយៈហ្វេសប៊ុកផេករបស់ ឆលី ដែលគ្រួសារបានបង្ហោះរៀបរាប់ជូនដំណឹងនៅថ្ងៃទី ១៧ មិថុនា ថា ៖ «ដំណឹងដ៏អកុសលមួយ បានចេញមកពីមាត់វេជ្ជបណ្ឌិតផ្ទាល់របស់ ឆលី ថា ឆលី មិនអាចបន្តការព្យាបាលបានទៀតទេ គ្រាន់តែប្រើថ្នាំដើម្បីរក្សាពេលវេលារស់នៅជាមួយគ្រួសារ និង បងប្អូនជនរួមជាតិខ្មែរបានមួយរយៈពេល» និង «ក្នុងនាមជាគ្រួសារមានតែពាក្យថាសោកស្ដាយ ពេលដែលបានឮដំណឹងមួយនោះ អរគុណបងប្អូនជនរួមជាតិខ្មែរទាំងអស់នៅស្រឡាញ់ចូលចិត្តប្អូនប្រុសរបស់ខ្ញុំ ឆលី»។
ក្រោយទទួលដំណឹងដ៏សោកសៅនេះដែរ លើបណ្ដាញសង្គមមហាជនអ្នកប្រើប្រាស់ហ្វេសប៊ុក ក៏ដូចជាអ្នកសិល្បៈជាច្រើនបានចែករំលែកបង្ហាញក្ដីអាណិតចំពោះកុមារាដ៏គួរឱ្យស្រឡាញ់រូបនេះបន្តបន្ទាប់។
ក្នុងនោះដែរ គេក៏បានឃើញតារាចម្រៀងស្រី ពេជ្រ សូលីកា បានបង្ហោះសារបង្ហាញអារម្មណ៍រំជួលចិត្ត និង ក្ដីអាណិតដោយទឹកចិត្តជាម្ដាយដូចគ្នាមួយរូប ដែលអ្នកនាងបានបន្តអំពាវនាវដល់បងប្អូនមហាជនចូលរួមជួយតាមលទ្ធភាព ដើម្បីឱ្យគ្រួសារបន្តព្យាបាល ឆលី ឱ្យអស់ពីសមត្ថភាពផងដែរ។
សារនោះ ពេជ្រ សូលីកា បានរៀបរាប់ថា ៖ «ខ្ញុំគិតថាបងប្អូនបានទទួលដំណឹងដ៏សោកសៅរបស់ ឆលី រួចមកហើយ ប៉ុន្តែសំណេរមួយនេះ នាងខ្ញុំនៅតែបន្តសុំអំពាវនាវពីបងប្អូន បន្តជួយ ឆលី តិចក្ដី ច្រើនក្ដី ដើម្បីឱ្យគ្រួសាបានបន្តមើល ឆលី ឱ្យអស់ពីសមត្ថភាព។ «ដោយទឹកចិត្តជាម្ដាយ» ប្រះស្រាំអស់ហើយ ម្ដាយ ឆលី ចង់រុញបន្តឱ្យ ឆលី ទៅព្យាបាលទីកន្លែងផ្សេង តែគ្នាពុំមានលទ្ធភាពគ្រប់គ្រាន់ក្នុងការជួយ ឆលី បានទាន់ពេលនោះទេ។ នាងខ្ញុំជំនួសមុខឱ្យគ្រួសារ ឆលី សូមអំពាវនាវបងប្អូនបន្តជួយតាមលទ្ធភាពបងប្អូន ដល់ក្មេងកម្សត់ម្នាក់នេះផង ឱ្យគ្នាបានបន្តមើលឃើញពន្លឺនៃពិភពលោកដ៏ស្រស់ស្អាតមួយនេះផង Charlie-ឆលី»៕
