នៅថ្ងៃទី ១៤ ខែសីហា ឆ្នាំ ២០២៥ បញ្ជារការដ្ឋានកងរាជអាវុធហត្ថខេត្តសៀមរាប បានជូនដំណឹងពីការឃាត់ខ្លួនជនសង្ស័យម្នាក់ ពាក់ព័ន្ធករណីរំលោភលើទំនុកចិត្ត (យកម៉ូតូ) ដោយយោងតាមពាក្យបណ្ដឹងរបស់ជនរងគ្រោះឈ្មោះ ភឿង សំបាន ភេទប្រុស អាយុ ៥០ ឆ្នាំ ជនជាតិខ្មែរ រស់នៅឃុំនគរភាស ស្រុកអង្គរជុំ ខេត្តសៀមរាប បានចោទប្រកាន់ទៅលើ ឈ្មោះ យុង ផាយីន ភេទប្រុស អាយុ ២០ ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅបច្ចុប្បន្ន ភូមិចំបក់ ឃុំចំបក់ ស្រុកម៉ាល័យ ខេត្តបន្ទាយមានជ័យ។
តាមប្រភពព័ត៌មាន បានបញ្ជាក់ពីសភាពរឿងហេតុឱ្យបានដឹងថា កាលពីម៉ោង ១៣:១៥ នាទី ថ្ងៃទី ០៥ ខែសីហា ឆ្នាំ ២០២៥ ជនសង្ស័យបានខ្ចីម៉ូតូជនរងគ្រោះទៅផឹកកាហ្វេមួយភ្លែត ស្រាប់តែបាត់រហូត នៅវេលាម៉ោង ១៨:០០ នាទី ថ្ងៃទី ១១ ខែសីហា ឆ្នាំ២០២៥ កម្លាំងមន្ទីរស្រាវជ្រាវ និង បង្ក្រាបបទល្មើសអង្គភាពនគរបាលយុត្តិធម៌ និង មន្ទីរស្រាវជ្រាវព័ត៌មានសន្តិសុខ បានចុះធ្វើការស្រាវជ្រាវ ឃាត់ខ្លួនបានជនសង្ស័យខាងលើ នៅចំណុចភូមិគោកដូង សង្កាត់ទឹកវិល ក្រុងសៀមរាប ខេត្តសៀមរាប ដែលបច្ចុប្បន្នជនសង្ស័យត្រូវបានការិយាល័យជំនាញកសាងសំណុំរឿង ដើម្បីអនុវត្តតាមនីតិវិធី។
ក្នុងប្រតិបត្តិការនេះ កងកម្លាំងបានចាប់យកវត្ថុតាងរួមមាន ៖
១. ម៉ូតូ ០១ គ្រឿងម៉ាក HONDA DREAM ពណ៌ខ្មៅ ឆ្នាំ ២០២៣ ពាក់ផ្លាកលេខ សៀមរាប 1AP-9349 (ជារបស់ជនរងគ្រោះ)
២. ទូរសព្ទដៃចំនួន ០២ គ្រឿងៈ (OPPO ចំនួន ០១ គ្រឿង និង realme ចំនួន ០១ គ្រឿង)៕
