ក្រោយពីដុំសាច់ក្នុងខួរក្បាលត្រូវបានដុះឡើងមកវិញក្រោយវះកាត់អស់រយៈពេល ២ ខែ កន្លះ និង មិនអាចបន្តព្យាបាលនៅប្រទេសថៃបាន កុមារា ឆលី មានពន្លឺសង្ឃឹមជាថ្មីហើយ ខណៈក្រុមគ្រួសារបានបញ្ជូន ឆលី ទៅព្យាបាលនៅប្រទេសម៉ាឡេស៊ី។
ក្រោយទៅដល់មន្ទីរពេទ្យនាប្រទេសម៉ាឡេស៊ីហើយនោះ អ្វីដែលកាន់តែមានរំភើបចិត្តគ្រូពេទ្យបានឱ្យដឹង ឆលី អាចបញ្ចូលកោសិកាដើម្បីព្យាបាលបានហើយ។
យ៉ាងណាមិញ ក្រោយពីទៅព្យាបាលនៅប្រទេសម៉ាឡេស៊ីបានប្រមាណជាង ១០ ថ្ងៃ ឆលី បានបង្ហាញនូវរូបភាព និង វីដេអូយ៉ាងស្រស់ស្រាយ ដោយ ឆលី ញុំាបានច្រើនជាងមុន និង មានសាច់ឈាមស្រស់បស់ទៀតផង។
ម្យ៉ាងវិញទៀត នៅថ្ងៃទី ១១ ខែកក្កដា ឆ្នាំ ២០២៥ នេះ អ្នកលេងបណ្តាញសង្គមហ្វេសប៊ុកមានអារម្មណ៍រំភើបជំនួសដល់កុមារា ឆលី ខណៈក្រោយមានជំងឺត្រូវសម្រាកព្យាបាលជាច្រើនឆ្នាំកន្លងទៅ ឆលី មិនបានទៅរៀនដូចក្មេងគេដទៃទេ ប៉ុន្តែពេលមកដល់ប្រទេសម៉ាឡេស៊ី ឆលី មានឱកាសបានចូលថ្នាក់រៀន មានមិត្តភក្តិបើទោះជារយៈពេលត្រឹម ២ ម៉ោងក្តី។
ក្នុងនោះដែរ តាមរយៈផេក ឆលី បានរៀបរាប់ថា៖ «វីរៈបុត្រ ខានចូលសាលា ២ ឆ្នាំ ហើយ។ ដុកទ័រទាំងអស់ចង់ឱ្យ វីៈបុត្រ មានអារម្មណ៍ដូចកាលមិនទាន់ឈឺ មានមិត្តភក្កិទៅសាលារៀនដូចក្មេងទូទៅ។ អរគុណធំៗ ពួកគាត់ខំមើលថែ វីរៈបុត្រ ចង់ឱ្យផ្លូវចិត្តកូនរឹងមាំ តស៊ូនឹងជំងឺ ពួកគាត់ខំទៅស្នើសុំសាលាឱ្យ វី:បុត្រចូលរៀន ២ ម៉ោង។ អរគុណអ្នកគ្រូ និង សិស្សៗតូចៗ ស្វាគមន៍ វីរៈបុត្រ យ៉ាងកក់ក្ដៅ»៕
