បុរសឥតសក់ ឬតម្ពែក អាចនឹងមានភាពជឿជាក់ឡើងវិញ ដោយហេតុយោងតាមការសិក្សាថ្មីមួយ ដែលធ្វើឡើងដោយគេហទំព័រណាត់ជួបគូស្នេហ៍ជួរមុខរបស់អង់គ្លេស Illicit Encounters គេរកឃើញថា ស្ត្រីមានការចាប់អារម្មណ៍ទៅលើបុរសក្បាលតម្ពែក ឬអត់សក់ ជាជាងបុរសមានសក់។
គេបានធ្វើការស្ទង់មតិទៅលើស្ត្រីចំនួន ២០០០ នាក់ ដើម្បីចង់ដឹងថា តើកន្លែងណាលើរូបរាងកាយបុរស ដែលទាក់ទាញចិត្តនារីបំផុត។ លទ្ធផលគួរឱ្យភ្ញាក់ផ្អើល ការស្រាវជ្រាវបានរកឃើញថា ក្បាលតម្ពែកជាចំណុចទាក់ទាញបំផុត ខណៈលេខរៀងបន្ទាប់គឺ សក់ពណ៌ខ្មៅ សក់រួញ និង សក់ពណ៌ទង់ដែង។
មូលហេតុដែលស្ត្រីចាប់អារម្មណ៍បុរសចំណុចនេះ ដោយសារតែបុរសតម្ពែកមើលមកមានបុគ្គលិកលក្ខណៈវិជ្ជមានដូចជា៖ ភាពចាស់ទុំ ឆ្លាតវៃ ស្មោះត្រង់ មានការអប់រំខ្ពស់ ក៏ដូចជា មិនគំរាមកំហែងនៅក្នុងសង្គម។ អ្វីដែលសំខាន់ ស្ត្រីខ្លះលើកឡើងថា បុរសតម្ពែកមើលមកសិចស៊ីខ្លាំង ជាពិសេស បើមានសាច់ដុំ មានពុកចង្កា និង ស្នាមសាក់ទៀត កាន់តែអ៊េម៕
ប្រភព៖ NYP
