អ្នកឡើងផ្លូវល្បឿនលឿនលើកដំបូង ឃើញគន្លងច្រើនមិនដឹងចូលមួយណាត្រូវ​ អាចមើលតាមវិធីនេះបាន

នាពេលថ្មីៗនេះ ក្រសួងសាធារណការ និង ដឹកជញ្ជូន បានចែករំលែកចំណេះដឹងអំពីការចេញចូលគន្លងទាំង ៣ ប្រភេទ លើផ្លូវល្បឿនលឿនឱ្យបានត្រឹមត្រូវ ដើម្បីជួយកាត់បន្ថយការកកស្ទះ និង មិនរង់ចាំយូរ។

ក្នុងនោះ ក្រសួងបានបញ្ជាក់ឱ្យដឹងថា ការចេញចូលលើគន្លងនៃច្រកចេញចូលមាន ៣ ប្រភេទ៖

១. គន្លង MTC

តម្រូវឱ្យយកកាត និង បង់សាច់ប្រាក់នៅច្រកចេញ។ ក្នុងករណីមានចរាចរណ៍មមាញឹក លោកអ្នកអាចប្រឈមនឹងការរង់ចាំយូរនៅច្រកចេញ។

២. គន្លង ETC

ជាច្រកអាទិភាព មានរបាំងបើកចេញចូលដោយស្វ័យប្រវត្តិ នៅខាងឆ្វេងបង្អស់ដែលមានសញ្ញា ETC។ ដើម្បីប្រើប្រាស់ លោកអ្នកត្រូវចុះឈ្មោះប្រើប្រាស់បំពាក់ឧបករណ៍ OBU នៅមជ្ឈមណ្ឌល ETC ឬទីតាំងកំណត់ដោយក្រសួង និង បញ្ចូលសមតុល្យតាមផ្លាកលេខមុននឹងប្រើប្រាស់។

៣. គន្លង ANPR ថ្មី

ជាច្រក អាទិភាពក្នុងការចេញចូល ដែលមានលក្ខណៈសាមញ្ញ។ លោកអ្នកគ្រាន់តែបញ្ជូលសមតុល្យតាមផ្លាកលេខជាមុន និង ចេញចូលគន្លងដែលមានសញ្ញា ANPR។ ការប្រើប្រាស់គន្លងនេះ មិនតម្រូវឱ្យយកកាត និង ប្រើប្រាស់សាច់ប្រាក់ឡើយ ដោយលោកអ្នកគ្រាន់តែបញ្ចូលសមតុល្យទៅក្នុងផ្លាកលេខជាការស្រេច។

សម្រាប់ព័ត៌មានបន្ថែម លោកអ្នកអាចទំនាក់ទំនងព័ត៌មានពីសេវាកម្មទៅកាន់លេខ 1399 និង ព័ត៌មានទូទៅទៅកាន់លេខ 1275៕