ឯកឧត្តម ទៀ ស្យាម បញ្ជាក់ ៤ ចំណុចកាន់តែច្បាស់ ពីការទម្លាក់ស្លាកយីហោចាស់ ផ្លាស់ប្ដូរដាក់ស្លាកយីហោថ្មី ដោយប្រភពប្រេងនឹងនាំចូលពីប្រទេសមួយនេះ

ជាការពិតណាស់ កន្លងមកមហាជននិយមតាមដាននៃដំណើរការទម្លាក់ស្លាកប្រេងឥន្ធនៈរបស់ថៃ PTT ច្បាស់ជាបានជ្រាបហើយថា នឹងមានការផ្លាស់ប្តូរទៅជាប្រេងឥន្ធនៈក្នុងស្រុក ដែលទើប និង បានបង្កើតឡើងភ្លាមៗដោយមានឈ្មោះថា PEACE Petroleum Cambodia។

យ៉ាងណាមិញ កាលពីថ្ងៃទី ២៨ ខែសីហា ឆ្នាំ ២០២៥ កន្លងទៅនេះ ឯកឧត្តម ទៀ ស្យាម អនុប្រធានសហព័ន្ធកីឡាយានយន្តកម្ពុជា និង ជាអ្នកទិញសិទ្ធិប្រេន ភីធីធី បានបង្ហោះសេចក្តីជូនដំណឹង ពីការទិញសិទ្ធិចែកចាយបន្ត និង ជាម្ចាស់ស្ថានីយតែ ២ ប៉ុណ្ណោះ។ លើសពីនោះ ឯកឧត្តម បានបន្ថែមថា ក្នុងចំណោមស្ថានីយយីហោថៃ ២០០ កន្លែង នៅកម្ពុជា គឺមាន ៣៥ ស្ថានីយនឹងសម្រេចចិត្តក្នុងការបង្កើតក្រុមហ៊ុន PEACE Petroleum Cambodia។

ឯកឧត្តម ទៀ ស្យាម បានលម្អិតថា៖ «គួរបញ្ជាក់ផងដែរថា ខ្ញុំគ្រាន់តែជាម្នាក់ក្នុងចំណោមអ្នកដែលបានទិញសិទ្ធិចែកចាយបន្តពីក្រុមហ៊ុនចាស់ ហើយជាម្ចាស់ស្ថានីយតែ ២ កន្លែងតែប៉ុណ្ណោះ ដែលក្នុងនោះ ស្ថានីយមួយកំពុងដំណើការ និង ស្ថានីយមួយទៀតកំពុងសាងសង់។

១. ដោយរងការឈឺចាប់ជាខ្លាំងពីបញ្ហា ដែលបានកើតឡើង ខ្ញុំបានសម្រេចចិត្តក្នុងការបង្កើតក្រុមហ៊ុន PEACE Petroleum Cambodia នេះឡើង ដោយមានការគាំទ្រ និង ជ្រោមជ្រែងពីបងប្អូនម្ចាស់ស្ថានីយទាំង ៣៥ ព្រមទាំងសាធារណជន។

២. ក្នុងចំណោមស្ថានីយប្រហែល ២០០ កន្លែង មានតែ ៣៥ ស្ថានីយតែប៉ុណ្ណោះ ដែលប្តេជ្ញាចិត្តយ៉ាងមុតមាំ ក្នុងការផ្តាច់កិច្ចសន្យាជាមួយក្រុមហ៊ុនចាស់ និង ផ្លាស់ប្តូរមកជា PEACE Petroleum Cambodia។

៣. បច្ចុប្បន្ននេះ យើងកំពុងតែរៀបចំនាំចូលស្តុកប្រេងថ្មី ដែលមានប្រភពមកពីក្រុមហ៊ុនដ៏ធំមួយនៅសហរដ្ឋអាមេរិក។

៤. លើសពីនេះទៀត រាល់ការផ្លាស់ប្តូរបែបផែនរូបរាង និង ប្រព័ន្ធថ្មីៗរបស់ស្ថានីយ ត្រូវការពេលវេលា ការរៀបចំ និង សាងសង់ឡើងវិញ ដើម្បីឆ្លុះបញ្ចាំងនូវអត្តសញ្ញាណថ្មីរបស់ PEACE។ យើងខ្ញុំទាំងអស់គ្នាចង់បង្កើតនូវបរិយាកាសថ្មី ដើម្បីបំភ្លេចភាពឈឺចាប់ក្នុងអតីតកាល និងដើរលើវិថីមួយប្រកបដោយមោនភាពជាតិខ្មែរ»៕