គ្រាន់តែលើកឡើងពីឈ្មោះ លោក យុត្ថារ៉ា ឆានី ភ្លាម ប្រិយមិត្តអ្នកនិយមតាមដានខ្សែភាពយន្តខ្មែរកាលជំនាន់ឆ្នាំជាង ២០០០ ស្ដើងប្រាកដជានឹកដល់រូបរាងដ៏ស្រស់សង្ហា មុខមាត់មានមន្តស្នេហ៍ ស្នាមញញឹមដ៏ស្រស់ទាក់ចិត្តស្រីៗ ជាពិសេសគឺទេពកោសល្យសម្ដែងដ៏ប៉ិនប្រសប់របស់លោកក្នុងខ្សែភាពយន្តទាំងបុរាណ និង សម័យមិនខាន លើសពីនេះ លោកក៏ជាតារាសម្ដែងក្នុងវីដេអូខារ៉ាអូខេបទចម្រៀងពីដើមៗជាច្រើនផងដែរ។
យ៉ាងណាមិញ ច្រើនឆ្នាំកន្លងមកនេះ លោក យុត្ថារ៉ា ឆានី ក៏បានរសាត់កាយឃ្លាតឆ្ងាយពីអាជីពសិល្បៈ មិនបានបង្ហាញវត្តមានលេចមុខសម្ដែងក្នុងខ្សែភាពយន្តថ្មីៗនេះ ឬវីដេអូខារ៉ាអូខេថ្មីៗឡើយ ដោយប៉ុន្មានឆ្នាំចុងក្រោយនេះគេឃើញលោកបានប្រឡូកក្នុងវិស័យអចលនទ្រព្យ និង បង្កើតក្រុមគ្រួសារថ្មីសាងសុភមង្គលជាមួយភរិយាក្រោយយ៉ាងមានក្ដីសុខ។
បច្ចុប្បន្នអតីតតារាភាពយន្តដ៏ល្បីល្បាញរូបនេះ កំពុងមមាញឹកនឹងមុខរបរថ្មីមួយទៀត គឺការចិញ្ចឹមឃ្មុំយកទឹក ដែលចំការរបស់លោក មានទីតាំងស្ថិតនៅស្រុកអូរាំងឪ ខេត្តកំពង់ចាម ហើយការចិញ្ចឹមនេះទៀតសោត គឺលោកប្រើបច្ចេកទេសចិញ្ចឹមបែបធម្មជាតិ ដែលបច្ចុប្បន្នចំការឃ្មុំរបស់លោក កំពុងប្រមូលបានផលយ៉ាងច្រើនសន្ធឹកសន្ធាប់ដើម្បីឆ្លើយតបតាមតម្រូវការរបស់អតិថិជន៕
