ចាប់តាំងពីក្ដោបបានតំណែងជាគ្រូបង្វឹកក្នុងកម្មវិធីប្រឡងចម្រៀងរ៉េបចំនួន ២ លើកមក លោក KingChi កាន់តែមានឈ្មោះបោះសំឡេង ត្រូវបានមហាជនអ្នកស្រឡាញ់គាំទ្រវិស័យ Hip Hop នៅកម្ពុជាស្គាល់ពីទេពកោសល្យរបស់លោកកាន់តែច្បាស់តាមរយៈការបង្ហាត់បង្រៀនកូនក្រុមឱ្យមានភាពល្បីល្បាញទទួលស្គាល់ពីទស្សនិកជន ជាមួយបទពិសោធរាប់ឆ្នាំនៅក្នុងវិស័យរ៉េបមួយនេះ។
ងាកមកជីវិតឯកជនវិញ ដូចប្រិយមិត្តភាគច្រើនបានជ្រាបហើយថា KingChi មានគ្រួសារមួយដ៏កក់ក្ដៅ គឺមានភរិយាដ៏ប៉ុនប្រសប់ ព្រមទាំងមានកូនៗដ៏គួរឱ្យស្រឡាញ់ ហើយកន្លងមក មិនថាតាមរយៈសកម្មភាពនៅតាមឆាកតន្រ្តី ឬសកម្មភាពនៅលើហ្វេសប៊ុកទេ KingChi តែងបង្ហាញពីមោទកភាពដែលមានគ្រួសារមួយដ៏ពេញលេញ ហើយក៏តែងបង្ហាញថាលោកស្មោះត្រង់ចេះយកអាសាភរិយាបណ្ដូលចិត្តជានិច្ច។
ជាក់ស្ដែង សូម្បីតែនៅលើដងខ្លួនរបស់ KingChi ថ្មីៗនេះគេឃើញតារាចម្រៀងរ៉េបកំពុងមានឥទ្ធិពលរូបនេះ ដោះអាវបញ្ចេញស្នាមសាក់លើដងខ្លួន និង ដៃ ត្រូវបានមហាជនអ្នកគាំទ្រចាប់អារម្មណ៍ឃើញថា នៅលើដងខ្លួន និង ដៃទាំងសងខាងរបស់លោកសុទ្ធតែស្នាមសាក់មិនខុសអ្វីពីសិល្បកររ៉េបដទៃឡើយ ប៉ុន្ដែអ្វីដែលបញ្ជាក់ពីបេះដូងស្មោះត្រង់ចំពោះគ្រួសារនោះ ក្រៅពីរូបភាពស្រ្តីទំនងជាម្ដាយរបស់លោក គេក៏ឃើញលោកសាក់រូបប្រពន្ធ និង កូនលើខ្លួន ដែលធ្វើឱ្យអ្នកគាំទ្រលើកឡើងថា KingChi ពិតជាបុរសស្មោះស្នេហ៍ និង ស្រឡាញ់គ្រួសារមែន៕
សូមចុចទីនេះ ដើម្បីទស្សនាវីដេអូ ៖
