ថ្ងៃនេះ តាមរយៈការប្រកួតវគ្គផ្តាច់ព្រ័ត្រកម្មវិធី Miss Universe លើកទី ៧៤ បេក្ខភាពកម្ពុជាយើង គឺ ហ្វីយ៉ាតា មិនបានជាប់ក្នុងតំណែង Top ណាមួយឡើយ។ តែយ៉ាងណាមិញ មាន ៥ ចំណុច ដែលបង្ហាញច្បាស់ៗថា ហ្វីយ៉ាតា នាងបានឈ្នះរួចទៅហើយក្នុងបេះដូងប្រជាជនកម្ពុជាយើង។
១. ឈ្នះបេះដូងមហាជន
បើទោះមិនជាប់តំណែងណាមួយ ប៉ុន្តែ ហ្វីយ៉ាតា បានក្លាយជាបេក្ខភាពតំណាងប្រទេស ដែលមានការចាប់អារម្មណ៍ និង ស្គាល់ច្រើនបំផុត។ នេះដោយសារតែនាង បង្ហាញខ្លួនដោយទំនុកចិត្ត មានបុគ្គលិកលក្ខណៈរួសរាយ មានមន្តស្នេហ៍ ជាខ្លួនឯង ដែលធ្វើឱ្យទាំងមហាជន ជាពិសេស បេក្ខភាពប្រកួតដទៃចូលចិត្តស្រលាញ់ និង គាំទ្រ។
២. លើកតម្កើងកម្ពុជានៅលើឆាកអន្តរជាតិ
ហ្វីយ៉ាតា បង្ហាញកម្ពុជាបានយ៉ាងល្អនៅអន្តរជាតិ រាប់តាំងពីវប្បធម៌ ការស្លៀកពាក់ អត្តសញ្ញាណ ដែលធ្វើឱ្យកម្ពុជាលេចធ្លោទាំងនៅមុខ និង ក្រោយកាមេរ៉ា។ ការបង្ហាញខ្លួន និង មោទកភាព ដែលនាងបាននាំមកជូនប្រទេសជាតិ គឺជាជ័យជម្នះ ដែលគ្មានមកុដណាអាចជំនួសបាន។
៣. នាងពូកែបត់បែន និង អត់ធ្មត់ខ្លាំង
ការប្រកួតបវរកញ្ញា មិនមែនជាការយកឈ្នះតែមួយមុខនោះទេ តែវាជាការចេះវិវឌ្ឍន៍ខ្លួន បូករួមនឹងពូកែបត់បែន និង រក្សាភាពអំណត់ផងដែរ។ ជាក់ស្តែង ហ្វីយ៉ាតា នាងអាចគ្រប់គ្រងបានទាំងសម្ពាធ ការហ្វឹកហាត់ និង ការប្រឈម ប្រកបដោយស្នាមញញឹម និង ភាពរឹងមាំជានិច្ច។ នេះមិនត្រឹមតែបង្ហាញថា នាងអាចឈ្នះក្នុងបេះដូងមហាជនប៉ុណ្ណោះទេ តែថែមទាំងឈ្នះសម្រាប់អាជីពរបស់នាងនាថ្ងៃអនាគតផងដែរ។
៤. នាងខ្លាំងខាងភ្ជាប់ទំនាក់ទំនាក់
រាប់តាំងពីអ្នកច្នៃម៉ូដ អ្នករៀបចំកម្មវិធី និង បុគ្គលសំខាន់ៗនៅក្នុងការប្រកួត បូករួមទាំងហ្វេនជាតិ និង អន្តរជាតិផងនោះ នាងបានបង្កើតទំនាក់ទំនងប្រកបដោយភាពស្និទ្ធស្នាល ដែលនឹងធ្វើឱ្យនាងទទួលបានការគាំទ្ររយៈពេលវែង ក៏ដូចជាឱកាសជាច្រើននៅក្នុងវិស័យពាក់ព័ន្ធដូចជា ការបង្ហាញម៉ូដ ប្រព័ន្ធផ្សព្វផ្សាយ និង កម្សាន្ត។ អាចថា ទោះមកុដរសាត់បាត់ទៅ តែទំនាក់ទំនងនៅតែឋិតឋេររហូត។
៥. ក្លាយជាបុគ្គលគំរូ និង ចារជាប្រវត្តិសាស្ត្រសម្រាប់កម្ពុជា
មហិច្ឆតា និង ភាពក្លាហានក្នុងការចេញទៅប្រកួតលើទឹកដី ដែលកំពុងមានភាពចម្រូងចម្រាសជាមួយកម្ពុជា អាចថានាងជាស្ត្រីខ្មែរទីមួយហើយ ដែលក្លាហាន ហ៊ានបង្ហាញមុខជាកម្ពុជាដល់ទីតាំងទាំងមិនញញើត។ ការលះបង់ និង ថាមពលរបស់នាង បានក្លាយជាកម្លាំងជំរុញចិត្តសម្រាប់អ្នកបន្តបន្ទាប់ ឬ អ្នកជំនាន់ក្រោយ ក៏ដូចជាជំរុញចិត្តគ្រប់គ្នាឱ្យពុះពារដើម្បីគោលដៅ។ ទាំងនេះហើយ ដែលធ្វើឱ្យនាងក្លាយជាអ្នកឈ្នះពិតប្រាកដនៅក្នុងបេះដូងប្រជាជនកម្ពុជា និង ប្រទេសកម្ពុជាទាំងមូល៕
