ក្នុងពិធីមង្គលការដ៏ធំរបស់តារាចម្រៀងប្រុសស្រី ទេព បូព្រឹក្ស និង លោក ជី ដេវីត ប៉ុន្មានថ្ងៃកន្លងទៅនេះ ឃើញថាមហាជនអ្នកគាំទ្រលើបណ្ដាញសង្គមចាប់អារម្មណ៍ចែករំលែកខ្លាំងពីទិដ្ឋភាពនៃកម្មវិធីទាំងមូល ជាពិសេសអ្នកគាំទ្រផ្ទុះការសរសើរខ្លាំងពីភាពដ៏ស្រស់ស្អាតរបស់កូនក្រមុំ កូនកំលោះ ក្នុងឈុតសម្លៀកបំពាក់ស្អាតៗប្រណីតៗពីកម្មវិធីមួយទៅកម្មវិធីមួយ។
និយាយដល់ឈុតរបស់កូនក្រមុំ ទេព បូព្រឹក្ស គ្រប់កម្មវិធីក្នុងថ្ងៃមង្គលនេះដែរ គឺឃើ់ញថាសុទ្ធសឹងតែស្រស់ស្អាត ទាំងឈុតកូនក្រមុំបែបប្រពៃណីក្នុងកម្មវិធីបែបប្រពៃណីខ្មែរផ្សេងៗ និង ឈុតក្នុងកម្មវិធីជប់លៀង កម្មវិធីកាត់នំ ដែលបានរចនាឡើងស្រស់ប្រណីតស័ក្តិសមនឹងសម្រស់ដ៏គួរឱ្យស្រឡាញ់របស់អ្នកនាង។
យ៉ាងណាមិញ បើចាប់អារម្មណ៍ដល់ឈុតរបស់អ្នកនាង ទេព បូព្រឹក្ស ក្នុងកម្មវិធីជប់លៀងបន្ទាប់ពីឈុតកាត់នំក្នុងថ្ងៃមង្គលវិញ គឺជាឈុតពណ៌សខ្លីរចនាឡើងបែបឃ្យូតៗរំលេចដោយម៉ូដផ្កាកុលាបប៉ុន្មានទង ដែលអ្នកនាងបានពាក់ឡើងច្រៀង និង រាំ ក្នុងពិធីជប់លៀងនោះ គឺជាស្នាដៃរចនាម៉ូដដោយអ្នកច្នៃម៉ូដវ័យក្មេងរូបស្រស់ឈ្មោះកញ្ញា Amaris Desi ដែលគេស្គាល់ថាជាច្នៃម៉ូដដ៏មានស្នាដៃមួយរូប។
លើសពីនេះ សម្រាប់ឈុតរបស់អ្នកនាង ទេព បូព្រឹក្ស ក្នុងថ្ងៃជប់លៀងជាមួយអ្នកគាំទ្រវិញ ជាឈុតបែបរាត្រីសមោសររចនាឡើងរំលេចពណ៌មាស ដែលអ្នកនាងបានពាក់ឡើងច្រៀងលើឆាកនោះ ក៏ជាស្នាដៃច្នៃយ៉ាងប្រណីតស្អាតចេញពីអ្នកច្នៃម៉ូដរូបនេះផងដែរ៕
