ចាប់តាំងពីលាជីវិតនៅលីវ ហើយសម្រេចចិត្តរៀបការសាងគ្រួសារជាមួយលោក ប៉ុល វិបូ កាលពីថ្ងៃទី ១៦ ខែមីនា ឆ្នាំ ២០២០ មក តារាសម្ដែងស្រីពោរពេញដោយទេពកោសល្យ អ្នកនាង ម៉ាក សែនសូនីតា ហៅ តូតា ក៏ឡើងជាថៅកែស្រី ហើយមានជំនួញកាន់កាប់ក្នុងដៃជាបន្តបន្ទាប់។
គេចាំបានថា ក្រោយរៀបការភ្លាម តូតា និង ស្វាមី ក៏សម្រេចយកទាយាទស្នងត្រកូលភ្លាម ដោយមកដល់ពេលនេះ នាង និង ស្វាមីទទួលបានចំណងដៃកូនប្រុសចំនួន ២ នាក់ហើយ។ ដោយត្រូវបំពេញតួនាទីជាម្ដាយផង និង ជាភរិយាដ៏ល្អផង តូតា ហាក់ផ្ដាច់ខ្លួនចេញពីវិស័យសម្ដែងស្ទើរទាំងស្រុង ដោយកន្លងមក គេពុំសូវបានឃើញនាងលេចមុខក្នុងខ្សែភាពយន្ត ឬវីដេអូចម្រៀងផ្សេងៗដូចកាលពីមុនឡើយ លើកលែងតែកម្មវិធីរបស់អ្នកសិល្បៈប៉ុណ្ណោះ។
ក្រៅពីមើលថែគ្រួសារប្រកបដោយសុភមង្គលហើយនោះ តូតា ក៏ជាថៅកែស្រីហាងលក់គ្រឿងអលង្ការ, ផ្ទះសំណាក់នៅកោះស្ដេច, លក់ផលិតផលផ្នែកសម្រស់ និង មានលក់គ្រឿងសមុទ្រតាមអនឡាញ ព្រមទាំងមុខរបរមួយចំនួនទៀត ដែលកំពុងដំណើរការ និង ទទួលបានការគាំទ្រពីអតិថិជន៕
