មួយរយៈធំមកហើយដែលតារាចម្រៀងបែបយុវវ័យ អ្នកនាង អេដា បានបន្សាត់ខ្លួនឃ្លាតឆ្ងាយពីវិស័យសិល្បៈចម្រៀង ពោលគឺចាប់តាំងពីអ្នកនាងមានទម្ងន់កូនដំបូង រហូតពេលនេះកូនប្រុសដែលជាតំណក់ឈាមតែម្នាក់រវាងនាង និង ស្វាមី មានអាយុជាង ២ ខួបហើយ។
មកដល់ពេលនេះ អេដា នៅតែបន្តស្ងប់ស្ងាត់មិនទាន់ចេញបទចម្រៀងថ្មីៗដើម្បីបម្រើអារម្មណ៍ទស្សនិកជន ក៏ដូចជាអ្នកគាំទ្រនាងនៅឡើយ ដោយម្ចាស់បទ «ទីនេះកំពុងមានមនុស្សខូចចិត្ត» រូបនេះ កំពុងសំងំមើលថែកូន និង បំពេញតួនាទីជាភរិយាដ៏ល្អចំពោះស្វាមី ហើយរស់នៅប្រកបដោយសុភមង្គលក្នុងជីវិតដែលមានសឹងតែគ្រប់យ៉ាង ដោយស្វាមីរបស់អ្នកនាង ត្រូវបានគេដឹងថា គឺជាអ្នកជំនួញដ៏មានមុខមាត់មួយរូប។
ប៉ុន្មានឆ្នាំចុងក្រោយនេះ អេដា និង គ្រួសារ តែងឡើងចុះសហរដ្ឋអាមេរិក និង ស្រុកខ្មែរ ហើយជារឿយៗ តារាស្រីរូបនេះ តែងបង្ហាញពីសកម្មភាពដើរកម្សាន្តជុំស្វាមី និង កូន ស្ដែងពីក្ដីសុខក្នុងគ្រួសារយ៉ាងពេញបរិបូណ៍ ហាក់ដូចជាមិននឹកនាត្រលប់មកផលិតចម្រៀងវិញឡើយ។
ទោះជាបែបនេះក្ដី អ្នកគាំទ្ររបស់ អេដា នៅតែរង់ចាំ idol ត្រលប់មកបញ្ចេញស្នាដៃ ផលិតចម្រៀងឡើងវិញ ព្រោះថាកន្លងមក បទចម្រៀងពោរពេញដោយមនោសញ្ចេតនារបស់អ្នកម៉ាក់អភិជនរូបនេះ នៅតែដក់ជាប់ក្នុងអារម្មណ៍អ្នកស្ដាប់មិនជិនណាយឡើយ៕
