អ្នកគាំទ្រនិយមតាមដានលោក ខាន់ ជេមស៌ ច្បាស់ជាបានជ្រាបហើយថា បច្ចុប្បន្ន នៅក្នុងគ្រួសារលោក មិនត្រឹមតែលោកនោះទេ ដែលកំពុងបន្តដំណើរយ៉ាងជោគជ័យលើវិថីសិល្បៈក្នុងនាមជាតារាចម្រៀង ប៉ុន្តែតារាចម្រៀងប្រុសរូបនេះ ក៏មានកូនៗសុទ្ធសឹងតែមានដុងផ្នែកសិល្បៈ មិនចាញ់គ្នានោះឡើយ។
ជាក់ស្តែង កូនប្រុសស្រីទាំង ៤ របស់លោក ខាន់ ជេមស៌ គឺសុទ្ធសឹងតែមានទេពកោសល្យផ្នែកចម្រៀងដូចជាឪពុក ដោយក្នុងនោះ កូនប្រុសស្រីច្បង ៣ នាក់ របស់លោកក៏ជាតារាចម្រៀងអាជីព និង មានខ្លះជ្រកក្រោមផលិតកម្មជាមួយឪពុកដែរ។
ដោយឡែក ថ្មីៗនេះ លោក ខាន់ ជេមស៌ បានបង្ហោះសារមួយយ៉ាងរីករាយ ក្នុងនាមជាឪពុក ដោយលោកផ្តើមចេញពីតារាចម្រៀងច្រៀងលើឆាកតែម្នាក់ឯងកាលពីជាង ១០ ឆ្នាំមុន តែពេលនេះ មានកូនៗមកឈរច្រៀងជាមួយគ្នានៅលើឆាកតែមួយយ៉ាងជោគជ័យ។
ក្នុងនោះ លោក ខាន់ ជេមស៌ រៀបរាប់ថា៖ «វាដូចជាសុបិនអ៊ីចឹង ខ្ញុំក៏មិននឹកស្មានថា អាចមានថ្ងៃនេះដែរ ធ្លាប់តែជាង ១០ ឆ្នាំមុន ដើរច្រៀងតែម្នាក់ឯង តែឥលូវនេះមានកូនស្រី កូនប្រុសដ៏ល្អរបស់ខ្ញុំ មកកំដរហើយ។ ពិតជារំភើប និង នឹកស្មានមិនដល់មែន ហើយខ្ញុំបាទក៏សូមគោរពអរគុណ ទៅដល់ពុកម៉ែបងប្អូនសម្រាប់ការគាំទ្រទាំងរូបខ្ញុំ និង កូនៗរបស់ខ្ញុំបាទ»៕
