ឱនរើសរបស់បន្តិចសោះ បាក់ឆ្អឹងឮសូរផស ទៅពេទ្យពិនិត្យទើបដឹងថា ឆ្អឹងពុកដោយសារផឹកកាហ្វេមួយថ្ងៃ ៤ កែវ

មានករណីនៅប្រទេសចិនមួយ ដែលនារីវ័យ ២៥ ឆ្នាំ បានបាក់ឆ្អឹងយ៉ាងមិននឹកស្មាន ក្រោយពីឱនរើសអាវតែបន្តិចសោះ លុះទៅមន្ទីរពេទ្យពិនិត្យទើបដឹងថានាងពុកឆ្អឹង ដោយសារតែផឹកកាហ្វេមួយថ្ងៃដល់ទៅ ៤ កែវ។

តាមព័ត៌មានបានឱ្យដឹងថា នារីម្នាក់នេះមកពី Ningbo ខេត្ត Zhejiang ប្រទេសចិន នាងជាម្ចាស់ហាងលក់ខោអាវមួយ ដែលមានការមមាញឹកខ្លាំងណាស់ ដែលតម្រូវឱ្យនាងអត់បានគេងជាញឹកញាប់។ ក្នុងនោះ នាងក៏មានទម្លាប់ផឹកកាហ្វេជារៀងរាល់ថ្ងៃ គឺព្រឹកឡើងនាងផឹកកាហ្វេ Americano នៅថ្ងៃត្រង់នាងផឹកកាហ្វេ Latte លុះរសៀលជ្រេរបន្តិចនាងផឹក Mocha ចំណែកនៅពេលល្ងាចនាងផឹក White Flat ហើយនាងបានផឹកបែបនេះមកជាង ៤ ទៅ ៥ ឆ្នាំទៅហើយ។

លុះដល់ថ្ងៃមួយ ខណៈនាងកំពុងតែឱនមើលខោអាវក្នុងហាង ស្រាប់តែមានការឈឺចាប់ខ្លាំងដូចជាបាក់ឆ្អឹង ទើបនាងក៏បានឱ្យមិត្តភក្តិជូនទៅមន្ទីរពេទ្យ។ ពេទ្យក៏បានពិនិត្យឃើញថានាងបានបាក់ឆ្អឹង ដោយសារតែការពុកក្នុងកម្រិតមធ្យម។ ក្នុងនោះដែរ គ្រូពេទ្យបានឱ្យដឹងថា ការពុកឆ្អឹងរបស់នាងអាចបណ្តាលមកពីការទទួលទានកាហ្វេក្នុងបរិមាណច្រើន ដោយកាហ្វេមានជាតិអាស៊ីត oxalic ដែលវាធ្វើឱ្យពោះវៀនស្រូបយកជាតិកាល់ស្យូមមិនបានល្អ ចំណែកជាតិកាហ្វេអ៊ីនធ្វើឱ្យនោមតិច និង បណ្តេញជាតិកាល់ស្យូមចេញតាមទឹកនោម៕

ប្រភព៖ Kapook