នៅក្នុងសន្និសីទសារព័ត៌មាន នៅព្រឹកថ្ងៃទី ១ ខែសីហា ឆ្នា ២០២៥ នេះ ឯកឧត្តមឧបនាយករដ្ឋមន្រ្តី ស៊ុន ចាន់ថុល បានមានប្រសាសន៍ពីសន្លឹកបៀរចុងក្រោយដែលកម្ពុជាបានយកទៅចរចាជាមួយសហរដ្ឋអាមេរិក។
តាមប្រសាសន៍របស់ឯកឧត្តមឧបនាយករដ្ឋមន្រ្តីបានឱ្យដឹងថា ឯកឧត្តមបានស្នើទៅសម្ដេចតេជោ ហ៊ុន សែន ដោយទម្លាក់អត្រាពន្ធនាំចូលលើគ្រប់មុខទំនិញទាំងអស់ពីសហរដ្ឋអាមេរិកមកត្រឹមអត្រា សូន្យ គ្រប់មុខទំនិញ ដែលមានន័យថា រាល់ទំនិញនាំចូលពីអាមេរិកទាំងអស់មកកម្ពុជា គឺគ្មានពន្ធនោះទេ។
យ៉ាងណាមិញ នៅព្រឹកថ្ងៃទី ០១ ខែសីហា ឆ្នាំ ២០២៥ នេះ តាមការចេញផ្សាយពីខាងសេតវិមានរបស់សហរដ្ឋអាមេរិក លោកប្រធានាធិបតីអាមេរិក ដូណាល់ ត្រាំ បានសម្រេចទម្លាក់អត្រាពន្ធបដិកា សម្រាប់ការនាំចូលទំនិញពីកម្ពុជាពី ៣៦% មកនៅត្រឹម ១៩% ប៉ុណ្ណោះ។
ត្រលប់មកក្នុងសន្និសីទកាសែតនៅព្រឹកថ្ងៃទី ១ ខែសីហា ឆ្នាំ ២០២៥ ដដែលនេះវិញ ឯកឧត្តម ស៊ុន ចាន់ថុល ក៏បានបញ្ជាក់បន្ថែមដែរថា អត្រាពន្ធ ១៩% នេះ ធ្វើឱ្យកម្ពុជាមានលទ្ធភាពក្នុងការប្រកួតប្រជែងជាមួយប្រទេសជិតខាង ព្រោះដ្បិតថាអត្រាពន្ធដូចគ្នាពិតមែន ប៉ុន្ដែកម្លាំងពលកម្មរបស់កម្ពុជាទាបជាង វ័យក្មេងជាងប្រទេសជិតខាង ម្យ៉ាងប្រទេសកម្ពុជានៅចំកណ្ដាលតំបន់មេគង្គងាយស្រួលក្នុងការវិនិយោគ លើសពីនេះ ច្បាប់វិនិយោគកម្ពុជា បានផ្ដល់អត្ថប្រយោជន៍ជាច្រើនដល់អ្នកវិនិយោគ៕
