ថ្មីៗនេះ អ្នកលេងបណ្តាញសង្គមហ្វេសប៊ុក បានផ្ទុះការចែករំលែក និង យល់ស្របនូវការលើកឡើងរបស់ឯកឧត្តមបណ្ឌិត ឆាយ សុផល រដ្ឋលេខាធិកាក្រសួងព័ត៌មាន បង្ហោះសំណេរគោរពស្នើដល់សម្តេចតេជោ និង សម្តេចធិបតី រក្សាទុកនូវស្លាកស្នាមរណ្ដៅ និង ទីតាំងខ្លះ ដែលត្រូវគ្រាប់ផ្លោង គ្រាប់បែកទាហានថៃទុកជាប្រវត្តសាស្ត្រ។
ក្នុងនោះ ឯកឧត្តមបណ្ឌិត រដ្ឋលេខាធិកាក្រសួងព័ត៌មាន បានមានប្រសាសន៍ថា៖ «សម្តេចតេជោ និង សម្តេចធិបតី ជាទីគោរពដ៏ខ្ពង់ខ្ពស់! ក្នុងនាមប្រជាពលរដ្ឋម្នាក់ ខ្ញុំបាទសូមគោរពសំណូមពរថា ស្លាកស្នាមរណ្ដៅ និង ទីតាំងខ្លះ ទាំងនៅក្នុង និង ក្រៅបរិវេណប្រាសាទ ដែលត្រូវបានបំផ្លាញដោយគ្រាប់ផ្លោង និង គ្រាប់បែកទម្លាក់ពីយន្តហោះ F-16 របស់កងទ័ពថៃឈ្លានពានត្រូវតែត្រូវបានរក្សាដោយព័ទ្ធរបងទុកជាប្រវត្តិសាស្រ្ត សម្រាប់អនុជនទាំងខ្មែរ និង បរទេសបានស្គាល់ និង ចងចាំ។ ទីតាំងទាំងនោះនឹងក្លាយជាកន្លែងបង្ហាញពីសោកនាដកម្មថ្មី ក្រៅពីទីតាំងដែលបន្សល់ទុកពីរបបខ្មែរក្រហមប្រល័យពូជសាសន៍»៕
