មានរឿងរ៉ាវដ៏គួរឱ្យហួសចិត្តមួយ បានកើតឡើងនៅប្រទេសឥណ្ឌា ដែលឪពុកខំរកប្រពន្ធឱ្យកូនប្រុសពៅ តែសុខៗបែរជាស្រឡាញ់ខ្លួនឯង ចុងក្រោយឪក្មេកជាមួយនឹងអនាគតកូនប្រសាលួចរត់តាមគ្នាទៅសាងស្នេហ៍តែពីរនាក់។
តាមព័ត៌មានបានឱ្យដឹងថា បុរសជាឪពុកដែលមានវ័យ ៥៥ ឆ្នាំ បានផ្សំផ្គុំកូនប្រុសពៅរបស់ខ្លួនដែលមានវ័យ ១៥ ឆ្នាំ ជាមួយនឹងនារីម្នាក់ដែលមានវ័យ ២២ ឆ្នាំ។ ក្រោយពេលទៅលេងផ្ទះអនាគតកូនប្រសាស្រីហើយ ស្រាប់តែបុរសរូបនេះក៏កើតចិត្តស្រឡាញ់នាង ទាំងដែលខ្លួនឯងកំពុងមានប្រពន្ធ និង កូន ៦ នាក់រួចទៅហើយ។ បុរសរូបនេះ ជាមួយអនាគតកូនប្រសា តែងមានកាយវិការស្និទ្ធស្នាលជាមួយគ្នាខុសពីធម្មតា រហូតដល់ធ្វើឱ្យស្រ្តីជាប្រពន្ធមិនពេញចិត្ត តែបុរសរូបនេះក៏បានគំរាម និង ប្រើអំពើហិង្សាទៅលើនាង។
លុះកូនប្រុសពៅដឹងថាគូដណ្តឹងកំពុងមានទំនាក់ទំនងជាមួយឪពុកបង្កើតរបស់ខ្លួន គេក៏បានបដិសេធពិធីមង្គលការជាមួយនាង ហើយក៏បានទម្លាយរឿងនេះឱ្យសាច់ញាតិដឹង។ ដោយឡែក នៅពេលដែលរឿងបានបែកធ្លាយ បុរសជាឪពុកក៏បានលួចលុយពីផ្ទះចំនួន ២ សែនរូពី ដែលស្មើប្រមាណនឹង ២៥០០ ដុល្លារ រួមជាមួយនឹងមាសមួយចំនួន ហើយក៏បាននាំអនាគតកូនប្រសាស្រីចេញពីផ្ទះបាត់ទៅ៕
ប្រភព៖ Timesofindia
