បន្ទាប់ពីឱ្យកូនទទួលចំណេះដឹងនៅសាលារៀន ឪពុកម្តាយដែលចង់ឱ្យកូនក្លាយទៅជាសហគ្រិនឬអ្នករកស៊ីទៅថ្ងៃអនាគត អ្នកគប្បីចាប់ផ្តើមបណ្តុះពួកគេតាំងពីវ័យក្មេង ដើម្បីឱ្យពួកគេមានភាពឯករាជ្យ ក៏ដូចជាស្គាល់ពីគោលដៅរបស់ខ្លួន។ អ្នកអាចចាប់ផ្តើមបណ្តុះ ៨ ចំណុចដូចខាងក្រោម៖
១. រៀបចំគោលដៅ
ឱ្យកូនសរសេរពីគោលដៅឬអាជីពចំនួន ១០ ដែលពួកគេចង់ធ្វើនាពេលអនាគត។ បន្ទាប់មកជ្រើសរើសមួយដែលស័ក្តិសមបំផុត។ គួរចងចាំថា គោលដៅដែលបានជ្រើសរើស គឺត្រូវនឹងចំណង់ចំណូលចិត្តកូន។ បន្ទាប់មកទៀត សរសេរជំហានសំខាន់ៗសម្រាប់តម្រង់ទិសដៅឆ្ពោះទៅរកវា ហើយជំរុញឱ្យកូនចាប់ផ្តើមធ្វើសកម្មភាពតាមជំហាននីមួយៗ។
២. រៀនស្គាល់ឱកាស
ការបង្រៀនកូនឱ្យចេះស្វែងរកឱកាស និង ចាប់ផ្តើមធ្វើសកម្មភាពដើម្បីសម្រេច អាចជួយពួកគេបានយ៉ាងច្រើនសម្រាប់ឱកាសជោគជ័យនាពេលអនាគត។ អ្នកអាចចង្អុលបង្ហាញកូននូវវិធីដោះស្រាយបញ្ហាតូចៗឬការបរាជ័យ ឧទាហរណ៍ដូចជា វិធីយករបស់ដែលនៅទីខ្ពស់ ឬការញុំានំប៉័ង និង ទឹកដោះគោជំនួសអាហារថ្ងៃត្រង់ជាដើម។ វិធីនេះ អាចបង្រៀនពីរបៀបដោះស្រាយបញ្ហាបែបវិជ្ជមាន និង បង្កើតគំនិតល្អៗសម្រាប់មុខជំនួញនាពេលអនាគត។
៣. ផ្នែកហិរញ្ញវត្ថុ
ការបង្រៀនកូនឱ្យស្គាល់ពីហិរញ្ញវត្ថុនៅវ័យកុមារ អាចជួយពួកគេបណ្តុះគំនិតលើការបង្កើតប្រាក់ចំណូល។ ឱ្យឱកាសកូនរកលុយដោយខ្លួនឯងតាមរយៈការងារបន្តិចបន្តួចដូចជា បង្កើតជំនួញតូចមួយផ្ទាល់ខ្លួន ឬឱ្យកូនជួយធ្វើការងារនៅក្នុអាជីវកម្មរបស់អ្នក។ ណែនាំកូនអំពីការវិនិយោគ និង វិធីយកប្រាក់របស់ពួកគេទៅបណ្តាក់ទុន ដើម្បីបានចំណូលបន្ថែមនាពេលអនាគត។ លើសពីនេះ ជួយពួកគេបង្កើតគណនីផ្ទាល់ខ្លួននៅធនាគារ និងបង្រៀនពីវិធីសន្សំប្រាក់។
៤. ជំរុញការច្នៃប្រឌិតបង្កើតជាជំនាញទីផ្សារ
បង្រៀនវិធីសាស្ត្រធ្វើទីផ្សារ គឺជាវិធីដ៏ល្អដែលអាចជួយរៀបចំកូនឱ្យចេះទាក់ទាញអតិថិជន។ អ្នកអាចឱ្យកូនសង្កេតមើលរបៀបផ្សព្វផ្សាយធ្វើទីផ្សារ ដូចជាផ្ទាំងប៉ាណូ ប៊េន័រប្រូម៉ូសិន ទំព័រផ្សព្វផ្សាយលើទស្សនាវដ្តី ការផ្សាយពាណិជ្ជកម្មលើទូរទស្សន៍ បណ្តាញសង្គម និង វិទ្យុជាដើម។ ក្រោយមកឱ្យពួកគេសាកល្បងគិត បើពួកគេជាម្ចាស់ផលិតផលឬក្រុមហ៊ុននោះ តើពួកគេនឹងចង់ផ្សព្វផ្សាយបែបណា។
៥. ស្គាល់ភាពបរាជ័យ
គួរឱ្យកូនស្គាល់ពីភាពបរាជ័យ ហើយរៀនពីវា រួចចាប់ផ្តើមបង្កើតអ្វីថ្មីសម្រាប់គោលដៅបន្ទាប់។ វិធីនេះអាចឱ្យកូនក្លាយជាមនុស្សរឹងមាំ និង ដឹងពីរបៀបដោះស្រាយដ៏ឆ្លាតវៃនៅពេលជួបស្ថានភាពលំបាក។ ដូចនេះ នៅពេលកូនធ្វើខុស គួរកុំដាក់ទោសពួកគេ ដោយជំនួសមកជាការពិភាក្សាវែកញែក ថាតើបញ្ហាបណ្តាលមកពីអ្វី រួចផ្តល់ដំណោះស្រាយដ៏ល្អ ជៀសវាងកើតឡើងម្តងទៀតនៅថ្ងៃមុខ។
៦. ទំនាក់ទំនង
ការធ្វើជំនួញជោគជ័យតម្រូវឱ្យមនុស្សចេះប្រើភាសានិយាយទាក់ទងគ្នា គួបផ្សំអាកប្បកិរិយាល្អផងដែរ។ អ្នកអាចធ្វើជាគំរូបង្រៀនកូនឱ្យចេះការគោរព និង ភាពរមទម។ សំខាន់បំផុត ត្រូវអនុវត្តប្រើក្រសែភ្នែកសម្លឹងទៅកាន់អ្នកដែលកំពុងនិយាយជាមួយ។ សម្រាប់ការទំនាក់ទំនងតាមទូរស័ព្ទ ឱ្យកូនទម្លាប់និយាយសុភាព និង សំឡេងច្បាស់។ ការចេះទំនាក់ទំនងប្រកបដោយប្រសិទ្ធភាព អាចឱ្យកូនយកឈ្នះបានគ្រប់ឧបសគ្គនៅពេលធ្វើអាជីវកម្ម រួមទាំងទំនាក់ទំនងផ្ទាល់ខ្លួននៅថ្ងៃអនាគត។
៧. ក្លាយជាអ្នកដឹកនាំពីឥលូវនេះ
ភាពជាសហគ្រិន គឺតម្រូវឱ្យពួកគេចាប់ផ្តើមសម្លឹងទៅខាងក្រៅឱ្យបានច្រើនជាងនេះដូចជា បង្កើតដំណោះស្រាយ និង ធ្វើជាអ្នកដឹកនាំជាដើម។ ចំណុចនេះនឹងធ្វើឱ្យកូនរបស់អ្នកក្លាយទៅជាអ្នកដឹងនាំវ័យក្មេង ជាមនុស្សមានទំនុកចិត្តខ្ពស់ និង មានឱកាសជោគជ័យច្រើន។ ចាប់ផ្តើមផ្តល់ឱកាសឱ្យកូនធ្វើជាមេក្រុមដឹកនាំមិត្តភក្តិនៅក្នុងសកម្មភាពសប្បាយៗដូចជា លេងកីឡា ច្រៀង អានសៀវភៅ ឬធ្វើជំនួញតូចៗ។ អ្នកក៏អាចឱ្យគេបញ្ចេញមតិយោបល់ចំពោះមុខម្ហូបប្រចាំថ្ងៃ ឬកម្មវិធីខួបកំណើតជាដើម។
៨. ផ្នែកលក់
សមត្ថភាពមួយនេះនឹងធ្វើឱ្យជីវិតល្អប្រសើរ ពីព្រោះវាអាចប្រើប្រាស់បានទៅលើគ្រប់ប្រភេទអាជីវកម្ម និង អាជីព។ អ្នកអាចជំរុញពួកគេឱ្យចាប់ផ្តើមជាមួយមុខជំនួញតូចៗដូចជា ការលក់សម្ភារ ល្បែងលេង ឬលក់ផលិតផលដែលធ្វើដោយដៃ។ ឱ្យពួកគេដាក់តម្លៃទៅលើផលិតផលទាំងនោះ ហើយលក់ទៅកាន់អតិថិជន និង រៀបចំសម្របសម្រួលការលក់ឱ្យបានសម្រេច៕
