ធ្មេចបើកៗ គិត ស៊ូឡា ដែលជាកូនប្រុសច្បងរបស់ អ្នកឧកញ៉ា គិត ម៉េង បានចម្រើនវ័យដល់អាយុ ២០ ឆ្នាំ ខណៈបច្ចុប្បន្នកូនប្រុសសង្ហារូបនេះ កំពុងកាន់តំណែងជានាយកគ្រប់គ្រងផ្នែកប្រតិបត្តិការ នៃក្រុមហ៊ុន រ៉ូយ៉ាល់គ្រុប អន្តរជាតិ។ ជាឪពុកដែលតែងតែតម្រែតម្រង់ផ្លូវ និង ផ្តល់ក្តីស្រលាញ់ដល់កូន ក្នុងថ្ងៃខួបកំណើតកូនប្រុស អ្នកឧកញ៉ា គិត ម៉េង ក៏បានបង្ហោះសារជាពាក្យពេចន៍ដ៏មានន័យចំពោះកូនផងដែរ។
អ្នកឧកញ៉ា គិត ម៉េង បានបង្ហោះសាររៀបរាប់នៅលើទំព័រហ្វេសប៊ុករបស់លោកថា៖ រីករាយថ្ងៃខួបកំណើតគម្រប់ ២០ ឆ្នាំ កូនប្រុសច្បងរបស់យើង គិត ស៊ូឡា!
កូនប្រុស ថ្ងៃនេះ កូនឈានជើងចូលទៅក្នុងទសវត្សរ៍ថ្មីនៃជីវិត។ កូនលែងជាក្មេងចំទង់ទៀតហើយ ប៉ុន្តែជាបុរសវ័យក្មេង ដែលពោរពេញដោយសមត្ថភាព និង សក្តានុពលនៅក្នុងដំណើរជីវិត។ នៅអាយុត្រឹមតែ ២០ ឆ្នាំ កូនមានចិត្តមោះមុត មានភាពច្បាស់លាស់ និង មានការខិតខំប្រឹងប្រែង បីដូចជាកូនមានបទពិសោធច្រើនជាងអាយុកូនទៅទៀត។ ប៉ាមានមោទកភាពក្រៃលែងចំពោះបុគ្គលិកលក្ខណៈរបស់កូននាពេលនេះ។
ការមើលឃើញកូនរីកលូតលាស់ទៅជាមនុស្សម្នាក់ដែលមានចក្ខុវិស័យខ្ពស់ មានក្តីមេត្តា និង គោលបំណងដ៏មុតមាំ គឺជាពរជ័យមួយដ៏អស្ចារ្យបំផុតនៅក្នុងជីវិតប៉ា។ នៅឆ្នាំនេះ នៅពេលដែលកូនមានទំនួលខុសត្រូវកាន់តែច្រើនក្នុងអាជីវកម្មគ្រួសាររបស់យើង ប៉ានឹកដល់ដំណើរជីវិតផ្ទាល់ខ្លួនរបស់ប៉ា គឺចាប់ផ្តើមពីតូច មានក្តីស្រមៃធំ ហើយបានកសាងអ្វីដែលយើងមានសព្វថ្ងៃនេះ។ ប៉ាពិតជាត្រេកអរដែលឃើញកូនចូលរួមជាផ្នែកមួយសំខាន់នៃធុរកិច្ចដ៏មានតម្លៃនេះតទៅមុខ។
នៅអាយុ ២០ ឆ្នាំ កូននឹងយល់ដឹងអ្វីៗជាច្រើន៖
– កូននឹងយល់ដឹងថាភាពជោគជ័យមិនមែនវាស់វែងដោយអ្វីដែលកូនសម្រេចបាននោះទេ។ ភាពជោគជ័យគឺជាការអភិវឌ្ឍបុគ្គលិកលក្ខណៈរបស់កូន។
– កូននឹងយល់ដឹងថាអ្នកដឹកនាំល្អ គឺជាអ្នកស្តាប់ច្រើនជាងនិយាយ ជាអ្នកផ្តល់ជំនួយ និងការគាំទ្រជាជាងបង្គាប់បញ្ជា។
– កូននឹងយល់ដឹងថាបរាជ័យមិនមែនជាទីបញ្ចប់ទេ ប៉ុន្តែជារឿយៗ បរាជ័យជាការចាប់ផ្តើមអ្វីមួយដ៏មានឥទ្ធិពលបំផុត។
– កូននឹងយល់ថាភាពឆ្លាតវៃ ឬទេពកោសល្យរបស់កូនគឺសំខាន់ ប៉ុន្តែអ្វីដែលធ្វើឱ្យកូនខ្លាំងរឹងមាំពិតប្រាកដនោះ គឺភាពធន់ គុណតម្លៃ និង ទឹកចិត្តរបស់កូន។
កូនប្រុស កូនត្រូវមានក្តីស្រមៃធំ។ ចូរកូនធ្វើជាអ្នកដឹកនាំប្រកបដោយក្តីសប្បុរស។ ចូរកូនរស់ក្នុងជីវិតមួយប្រកបដោយភាពសាមញ្ញ និង សុចរិត ដោយយកគុណតម្លៃទាំងនេះធ្វើជាអ្នកដឹកនាំកូន។ ចូរកូនបន្តធ្វើជាអ្នកចង់ចេះចង់ដឹង រក្សាឫករមទម និង បន្តអភិវឌ្ឍខ្លួនរហូត។
កូនទើបតែចាប់ផ្តើមដំណាក់កាលដ៏អស្ចារ្យនៃភាពពេញវ័យ ហើយប៉ាដឹងថាសកម្មភាពរបស់កូននឹងមានឥទ្ធិពល ឋិតឋេរ និង មានន័យ។
យើងជាឪពុកម្តាយ ជាគ្រួសាររបស់កូន មានមោទកភាពយ៉ាងខ្លាំងចំពោះកូន។ នេះជាដំណើរឆ្ពោះទៅមុខរបស់កូន។
រីករាយថ្ងៃខួបកំណើតគម្រប់ ២០ ឆ្នាំ កូនប្រុស គិត ស៊ូឡា! វត្តមានរបស់កូននឹងធ្វើឱ្យយើងទាំងអស់គ្នាកាន់តែប្រសើរទ្បើង»៕
