នៅថ្ងៃទី ៣ ខែកក្កដា ឆ្នាំ ២០២៥ នេះ មានឧទ្ធម្ភាគចក្រទាហានរបស់ថៃមួយគ្រឿង ត្រូវបង្ខំចុះភ្លាមៗនៅទីលានបាល់ទាត់ក្នុងសាលារៀនមួយកន្លែង ក្រោយពីមានភ្លៀងធ្លាក់ខ្លាំង ធ្វើឱ្យអ្នកស្រុកផ្អើលឈូឆរទៅចងខ្សែសីមាឱ្យអ្នកបើក ដើម្បីហៅព្រលឹងមកវិញ។
តាមព័ត៌មានបានឱ្យដឹងថា ឧទ្ធម្ភាគចក្រមួយគ្រឿងនេះ បានចុះនៅទីលានបាល់ទាត់នៃសាលា Kham Poung ឃុំ Kham Poung ស្រុក Pho Chai ខេត្ត Roi Et ដោយសារតែមើលមិនសូវច្បាស់ បន្ទាប់ពីមានព្យុះភ្លៀងខ្លាំង។ ក្នុងនោះ មិនមានគ្រោះថ្នាក់អ្វីកើតឡើងនោះទេចំពោះអ្នកបើកបរទាំង ៤ នាក់នោះទេ ហើយសិស្សៗនៅក្នុងសាលារៀនក៏បានផ្អើលនាំគ្នាទៅចោមរោមមើលពាសពេញ។
យ៉ាងណាមិញ អ្នកបើកបរទាំង ៤ នាក់ ក៏ត្រូវបានចាស់ៗនៅក្នុងស្រុកហៅទៅចងខ្សែអំបោះ ដើម្បីហៅព្រលឹងមកវិញ ខ្លាចក្រែងថាការចុះចតនេះ ធ្វើឱ្យមានការភិតភ័យ ពិបាកគ្រប់គ្រងស្មារតីជាដើម៕
ប្រភព៖ Thairath
