នៅថ្ងៃទី ២២ ខែឧសភា ឆ្នាំ ២០២៥ នេះ លោកឧត្តមសេនីយ៍ឯក ជួន ណារិន បានស្រាយបំភ្លឺករណីឃាតកម្ម លើក្មេងស្រីអាយុ ១៥ ឆ្នាំ ស្ថិតក្នុងខណ្ឌព្រែកព្នៅ នៅថ្ងៃទី ២១ ខែឧសភា ឆ្នាំ ២០២៥។
លោកឧត្តមសេនីយ៍ បានបញ្ជាក់ឱ្យដឹងថា ករណីនេះខាងសមត្ថកិច្ចស្រាវជ្រាវបង្ក្រាបបានជនសង្ស័យភ្លាមៗ ចំនួន ០៣ នាក់ (តែមានប្អូនប្រុសម្នាក់ផ្សព្វផ្សាយថាជាករណីរំលោភបូក ដែលបានលទ្ធផលថាចំនួន ៨ នាក់នោះ ជារឿងមិនពិតនោះទេ) ដែលជារឿងធ្វើឱ្យប៉ះពាល់អារម្មណ៌ និង កិត្តិយសដល់គ្រួសារនៃសពជាខ្លាំង ជាពិសេសមានការយល់ច្រឡំដល់មហាជន។
លោកបានបន្តថា ករណីនេះលោកបានដឹកនាំបញ្ជាផ្ទាល់ ហើយក្នុងការពិនិត្យធ្វើកោសល្យវិច្ច័យលើសាកសព មានព្រះរាជអាជ្ញា គ្រូពេទ្យ តុលាការ មន្ត្រីនគរបាលជំនាញ និង អង្កការ CPU ផងដែរ ដោយមានជនសង្ស័យ ត្រឹម ៣ នាក់ប៉ុណ្ណោះ តម្រូវឱ្យអ្នកដែលបានផ្សាយព័ត៌មានមិនពិតខាងលើ រក្សាក្រមសីលធម៌វិជ្ជាជីវៈ និង បកស្រាយឡើងវិញជាបន្ទាន់។
យ៉ាងណាមិញ លោកឧត្តមសេនីយ៍ឯក ជួន ណារិន ក៏បានសំណូមពរដល់ក្មួយៗស្រីៗ ឬ អាណាព្យាបាលទាំងឡាយ សូមកុំឆាប់ជឿការអូសទាញរបស់ជនខិលខូចមួយចំនួនតូចដែលមិនគួរឱ្យទុកចិត្ត ឬហៅចេញទៅកន្លែងស្ងាត់ៗ វាអាចមានហានិភ័យដូចរឿងខាងលើដែលបានកើតឡើង៕
