កាលពីថ្ងៃទី ១០ ខែសីហា ឆ្នាំ ២០២៥ កន្លងទៅនេះ សារព័ត៌មានថៃបានរាយការណ៍ថា មានឧត្តមសេនីយ៍ឯកម្នាក់បានបាត់បង់ជីវិត ដោយសារតែគ្រោះថ្នាក់ ខណៈកំពុងរៀបចំត្រៀមអាវុធនៅក្នុងមូលដ្ឋានព្រំដែនកម្ពុជា-ថៃ។
តាមព័ត៌មានបានឱ្យដឹងថា ទាហានខាងលើនេះ មានឈ្មោះថា Patcharawut Rattanawong មានឋានៈជាឧត្តមសេនីយ៍ផ្នែកទាហានជើងទឹក តែបានមកជួយខាងទាហានជើងគោកក្នុងការប្រយុទ្ធជាមួយកម្ពុជានៅតាមព្រំដែន ហើយចៃដន្យក៏បានប្រទះឧប្បទ្ទវហេតុ ខណៈកំពុងរៀបចំត្រៀមអាវុធនៅមូលដ្ឋានក្នុងខេត្តសុរិន្ទ បណ្តាលឱ្យរងរបួសធ្ងន់ធ្ងរ កាលពីថ្ងៃទី ២ ខែសីហា ឆ្នាំ ២០២៥ កន្លងទៅ។
យ៉ាងណាមិញ ឧត្តមសេនីយ៍ឯករូបនេះត្រូវបានគេបញ្ជូនទៅសង្រ្គោះនៅឯមន្ទីរពេទ្យ តែជាអកុសលនៅតែមិនអាចរក្សាជីវិតបាន ហើយក៏បានស្លាប់កាលពីថ្ងៃទី ៨ ខែសីហា ឆ្នាំ ២០២៥ កន្លងទៅ៕
ប្រភព៖ Matichon
