ឧត្តមសេនីយ៍ទោ ឈឿន សុចិត្ត សម្ដែងក្ដីឈឺចាប់ ពេលឃើញទិដ្ឋភាពស្រ្តីខ្មែរស្លូតត្រង់មោះមុតមិនខ្លាច «ដៃម្ខាងបីកូន ដៃម្ខាងរុញបន្លាលួស» តតាំងនឹងចោរថៃឈ្លានពាន

នៅថ្ងៃទី ២៥ ខែសីហា ឆ្នាំ ២០២៥ ចាប់ពីម៉ោង ១៤:២០ នាទី រសៀល កងកម្លាំងយោធារបស់ថៃ បានព្យាយាមរាយបន្លាលួសនៅភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ដែលទល់មុខភូមិសាស្ត្រភូមិ Nong Chan ស្រុក Khok Sung ខេត្តស្រះកែវ ប្រទេសថៃ ប៉ុន្តែក៏ត្រូវបានប្រជាពលរដ្ឋ និង សមត្ថកិច្ច នៅភូមិជោគជ័យ ធ្វើការទប់ស្កាត់យ៉ាងខ្លាំង ទើបកងកម្លាំងរបស់ថៃយកបន្លាលួសនោះត្រឡប់ទៅវិញ។

ទាក់ទិនទៅនឹងករណីនេះ តាមរយៈផេក ឧត្តមសេនីយ៍ទោ ឈឿន សុចិត្ត នៅថ្ងៃទី ២៥ ខែសីហា ឆ្នាំ ២០២៥ បានបង្ហោះសារសម្ដែងក្ដីឈឺចាប់ ទៅលើរូបភាពស្ត្រីម្នាក់ដែលបានតតាំងចោរឈ្លានពាន ដោយឥរិយាបថដៃម្ខាងពកូនជាទីស្រឡាញ់ ឯដៃម្ខាងទៀតកាន់ដំបងរុញបន្លាលួសចេញតតាំងនឹងការឈ្លានពានរបស់ទាហានថៃ ដោយលោកបានមានប្រសាសន៍ថា ៖ «ឈឺចាប់ណាស់លោកអើយ​ សៀមរាយលួសយកដី​ និង ផ្ទះសម្បែង ដៃម្ខាងកាន់កូន​ ដៃម្ខាងទៀតកាន់ដំបងរុញលួសបន្លា​ តតាំងចោរឈ្លានពាន។ ពីមួយថ្ងៃទៅមួយថ្ងៃ សៀមកាន់តែបង្ហាញឱ្យពិភពលោកបានឃើញកាន់តែច្បាស់ថាតើអ្នកណាឈ្លានពានអ្នកណា?»។

គួរឱ្យដឹងថា ទាក់ទិនទៅនឹងករណីថ្ងៃទី ២៥ ខែសីហា ក្រសួងការពារជាតិ បានឱ្យដឹងថាកម្ពុជាស្នើឱ្យភាគីថៃគោរពឱ្យបានពេញលេញ និង ខ្ជាប់ខ្ជួននូវបទឈប់បាញ់ និង ជាពិសេសស្មារតីនៃកិច្ចព្រមព្រៀង នៃកិច្ចប្រជុំវិសាមញ្ញរបស់គណៈកម្មាធិការព្រំដែនថ្នាក់យោធភូមិភាគ (RBC) រវាងយោធភូមិភាគទី ៥ របស់កម្ពុជា និង កងទ័ពភូមិភាគទី ១ របស់ថៃ ដែលបានប្រព្រឹត្តឡើងកាលពីថ្ងៃទី ២២ ខែសីហា ឆ្នាំ ២០២៥ កន្លងទៅថ្មីៗនេះ ពាក់ព័ន្ធនឹងការមិនពង្រីកភូមិសាស្ត្រ នៃជម្លោះ និង ជៀសវាងទង្វើដែលនាំទៅដល់ការកើនឡើងនៃភាពតានតឹង។

កម្ពុជាបញ្ជាក់ថា រាល់ទំនាស់ពាក់ព័ន្ធនឹងបញ្ហាព្រំដែនត្រូវយកទៅដោះស្រាយដោយគណៈកម្មាធិការចម្រុះខណ្ឌសីមាព្រំដែនគោក (JBC) នៃប្រទេសទាំងពីរ ស្របតាមស្មារតីនៃអនុស្សរណៈនៃការយោគយល់ឆ្នាំ ២០០០ (MOU 2000)៕