ជាស្ថាបនិកក្រុមហ៊ុន អានកូ ប្រាដឺ (Anco Brothers Co., Ltd) អ្នកឧកញ៉ា កុក អាន បានប្រឡូកក្នុងវិស័យជំនួញអស់រយៈពេលជិត ៥០ ឆ្នាំមកហើយ។ ជាក់ស្តែង អ្នកឧកញ៉ាបានចាប់ផ្តើមជំនួញតាំងពីទសវត្សរ៍ឆ្នាំ ១៩៨០ ដោយធ្វើមុខជំនួញលើការដោះដូរទំនិញឆ្លងកាត់ព្រំដែន។
សព្វថ្ងៃ ក្រុមហ៊ុន អានកូ ប្រាដឺ (Anco Brothers Co., Ltd) របស់អ្នកឧកញ៉ា ជាក្រុមហ៊ុនដ៏ធំមួយនៅក្នុងស្រុក ដែលមានបុត្រសម្ព័ន្ធក្នុងពហុវិស័យរួមមាន៖ ក្រុមហ៊ុនផ្គត់ផ្គង់អគ្គិសនី, ទឹកស្អាត, សេវាកម្មធនាគារ និង ប្រព័ន្ធទូទាត់ប្រាក់, សណ្ឋាគារ, កាស៊ីណូ, តំបន់កម្សាន្ត និង ក្រុមហ៊ុនអាហរ័ណនីហរ័ណ ព្រមទាំងរោងចក្រផលិតការ៉េម និង ទឹកបរិសុទ្ធ។
ក្រៅពីអាជីពជាអ្នកជំនួញ អ្នកឧកញ៉ាក៏ជាអ្នកគាំទ្រវិស័យកីឡាផងដែរ ជាពិសេសកីឡាបាល់ទាត់ ដោយលោកគឺជាស្ថាបនិកក្លិបកីឡាបាល់ទាត់ភ្នំពេញក្រោន (Phnom Penh Crown Football Club) ដែលបានបង្កើតឡើងតាំងពីឆ្នាំ ២០០១ បន្ទាប់ពីសហព័ន្ធកីឡាបាល់ទាត់កម្ពុជាបានរៀបចំលីគកំពូលរបស់ខ្លួនឡើងវិញ និង ត្រូវបានទទួលស្គាល់ថាជាក្លឹបបាល់ទាត់ ដែលទទួលបានជោគជ័យជាងគេនៅក្នុងប្រទេសកម្ពុជា។
អ្នកឧកញ៉ា កុក អាន កើតក្នុងឆ្នាំ ១៩៥៤ នៅខេត្តកោះកុង និង មានតួនាទីជាអនុប្រធានសមាគមឧកញ៉ាកម្ពុជា។ ជាមួយគ្នានេះ អ្នកឧកញ៉ា ក៏ជាសមាជិកព្រឹទ្ធសភា នៃព្រះរាជាណាចក្រកម្ពុជាផងដែរ។
ក្រៅពីកិច្ចការជំនួញ និង វិនិយោគ អ្នកឧកញ៉ា ក៏បានបរិច្ចាគទ្រព្យធនជាច្រើន ព្រមទាំងកម្លាំងកាយ ចិត្ត ប្រាជ្ញាស្មារតី និង ពេលវេលាក្នុងការចូលរួមយ៉ាងសកម្មនៅក្នុងសកម្មភាពសង្គម និង សកម្មភាពមនុស្សធម៌។
អ្នកឧកញ៉ា ត្រូវបានទទួលស្គាល់ពីរាជរដ្ឋាភិបាលកម្ពុជា តាមរយៈការផ្តល់ជូននូវគ្រឿងឥស្សរិយយសជាច្រើន ជាពិសេសគ្រឿងឥស្សរិយយសថ្នាក់កំពូល «ជាតូបការ» ដែលប្រោសព្រះរាជទានដោយព្រះមហាក្សត្រ នៃព្រះរាជាណាចក្រកម្ពុជាថែមទៀតផង៕
