ទោះកំពុងរស់នៅឯសហរដ្ឋអាមេរិក អ្នកស្រី កន្និដ្ឋា ម្ចាស់ផេក The Kanitha Show អ្នកផលិតមាតិកាវិភាគបញ្ហាសង្គមដ៏ល្បី ក៏មិនអើពើចំពោះរឿងប្រទេសជាតិដែរ។ រាល់ព័ត៌មានថ្មីៗ អ្នកស្រីតែងអាប់ឌែតវិភាគឱ្យប្រជាជនខ្មែរបានដឹងជានិច្ច។
ជាក់ស្តែងថ្មីៗនេះ ខណៈថៃមិនព្រមឱ្យប្រទេសទីបីធ្វើជាអ្នកចរចាបញ្ឈប់សង្គ្រាមរវាងកម្ពុជា-ថៃ អ្នកស្រី កន្និដ្ឋា បានវិភាគដោយលើកឡើងហេតុផលផងដែរ។ អ្នកស្រីបានសរសេរបង្ហោះនៅលើទំព័រហ្វេសប៊ុកយ៉ាងដូច្នេះថា៖
«អាមេរិក ចិន ម៉ាឡេស៊ី សុំចេញមុខធ្វើជាអ្នកចរចាបញ្ឈប់សង្រ្គាមរវាងកម្ពុជា-ថៃ តែត្រូវបានថៃបដិសេធមិនទទួលទេ តើហេតុអ្វីបានជាថៃបដិសេធយ៉ាងដូច្នេះ? បងប្អូន នេះវាដូចទៅនឹងអ្វីដែលខ្ញុំធ្លាប់បានផុសពន្យល់ប្រាប់ដល់បងប្អូនកាលពីមុនអីចឹង ខ្ញុំគិតថាយោធាថៃមិនចង់ឈប់នោះទេ តើយោធាថៃឈប់ធ្វើអ្វី បើពួកគេគឺជាអ្នកចាប់ផ្ដើមសង្រ្គាមហ្នឹង គេព្យាយាមដុតកម្ពុជាឱ្យឆេះកំហឹង ដើម្បីឱ្យគេបានលេសមកវៃហ្នឹងហើយ ហើយនៅពេលនេះគេវៃមិនទាន់អស់ចិត្ដគេទេ។
នៅមានហេតុផលមួយទៀត ដែលយោធាថៃបដិសេធមិនទទួលយកការសម្របសម្រួលពីប្រទេសទីបី។ នោះក៏ព្រោះតែថៃដឹងថា នៅពេលណាដែលស្ថិតនៅក្រោមការត្រួតពិនិត្យពីប្រទេសទីបី គឺថៃនឹងចាញ់។ ខ្ញុំសូមបញ្ជាក់ថា អ្វីដែលខ្ញុំនិយាយនេះមិនមែនសំដៅទៅប្រជាជនថៃ ឬប្រទេសថៃទាំងមូលនោះទេ គឺខ្ញុំសំដៅទៅលើពួកយោធាថៃតែប៉ុណ្ណោះ។
ខ្ញុំមិនសប្បាយចិត្ដទេ នៅពេលដែលប្រជាជនស្លូតត្រង់ទាំងសងខាងត្រូវបានស្លាប់ មិនថាខាងកម្ពុជា ឬ ថៃ។ នេះហើយគឺជាមូលហេតុដែលថៃគួរតែទទួលយកការសម្របសម្រួលពីប្រទេសទីបីដើម្បីបញ្ឈប់សង្រ្គាម»៕
