គិតត្រឹមថ្ងៃទី ១៣ ខែមិថុនា ឆ្នាំ ២០២៥ នេះ មានរយៈពេលមិនដល់ ១២ ម៉ោងឡើយ កម្ពុជា បានឆ្លើយតបទៅថៃចំនួន ៣ ចំណុចភ្លាមៗ រួមមានឈប់ទិញអ៊ីនធឺណិត, ឈប់ឱ្យបញ្ចាំងភាពយន្តថៃ ក្នុងទឹកដីកម្ពុជា និង បិទច្រកព្រំដែនដូង ដែលមានផលប៉ះពាល់ផ្ទាល់ដល់កសិករថៃដាំផ្លែឈើ។
ក្រៅពីនេះ ក៏មានការសម្រេចពីសហព័ន្ធប្រដាល់គុនខ្មែរ ពីការផ្អាកការផ្គូផ្គងកីឡាករប្រដាល់ ដែលមកពីប្រទេសថៃ ខណៈអ្នកប្រើប្រាស់បណ្ដាញសង្គមនៅកម្ពុជា ក៏បាននាំគ្នាបង្ហោះសារអំពីអាហារបែបម៉ូកៈថៈបែបថៃផងដែរ ដោយចង់ឱ្យម្ចាស់អាជីវកម្មដែលបានបើកនៅកម្ពុជា គួរតែប្ដូរឈ្មោះចេញពី ម៉ូកៈថៈបែបថៃ ទៅជា «គោឡើងភ្នំបែបខ្មែរ» ឬ «ជ្រូកឡើងភ្នំ» ជាដើម។
ដ្បិតថានេះជាមិនមែនជារឿងធំដុំក្ដី តែអ្នកប្រើប្រាស់បណ្ដាញសង្គមនៅកម្ពុជាជាច្រើន បាននាំគ្នាប្រកាន់គោលជំហរថា នេះគឺជាពេលវេលាល្អសម្រាប់ផ្លាស់ប្ដូរនូវឈ្មោះអាហារប្រភេទនេះ ឱ្យងាកមករកឈ្មោះបែបខ្មែរ បង្ហាញពីអត្តសញ្ញាណ ក៏ដូចជាជាតិនិយមរបស់យើងជាដើម ប្រសើរជាជាងប្រើពាក្យ និង ភាសាដែលមានទំនោរនិយមទៅកាន់ប្រទេសជិតខាងពេក៕
