អ្នករៀបចំកម្មវិធីសង្ក្រាន្ត បានចេញមុខសុំទោសសិល្បករ ដែលត្រូវលោកគ្រូម្នាក់ក្នុងសាលា ប្រកាសឱ្យឈប់ច្រៀងកណ្ដាលទី

ជាការពិតណាស់ ថ្មីៗនេះ អ្នកនិយមតាមដានបណ្តាញសង្គមហ្វេសប៊ុក ជាពិសេសក្នុងកម្មវិធីសង្ក្រាន្តតាមសាលាមួយចំនួន ច្បាស់ជាបានជ្រាបមកហើយនូវរឿងកើតឡើងចំពោះតារាប្រុស Ah Por ឬ Taa Zvet។

ក្នុងនោះដែរ វីដេអូ កំពុងត្រូវបានអ្នកសិល្បៈ និង អ្នកគាំទ្រមួយចំនួនមានការប្រតិកម្មនោះ ខណៈលោក Ah Por កំពុងច្រៀងនៅលើឆាកសុខៗ តែត្រូវបានលោកគ្រូម្នាក់ បានលើកមេក្រូមកនិយាយឱ្យបញ្ចប់ការសម្តែងភ្លាមៗ។

យ៉ាងណាមិញ ក្រោយផ្ទុះរឿងខាងលើកើតឡើងហើយនោះ កាលពីយប់ថ្ងៃទី ០៧ ខែមេសា ឆ្នាំ ២០២៥ នៃកម្មវិធីសង្ក្រាន្តខាងលើ ដែលគេដឹងថាជាកម្មវិធីសង្ក្រាន្តវិទ្យាល័យ សម្តេចឪ សម្តេចម៉ែ បរសេដ្ឋ ហើយនោះ គេបានឃើញសមាជិកគណៈកម្មការរៀបចំកម្មវិធី លោកគ្រូ សៀង សន បានចេញមកបង្ហោះសារសុំទោសជំនួស ដល់សិល្បកររូបនេះហើយ។

លោកគ្រូ សៀង សន បានរៀបរាប់ថា៖ «ក្នុងនាមខ្ញុំ ជាសមាជិកគណៈកម្មការរៀបចំកម្មវិធីសង្ក្រាន្ត និង ជាអ្នកអញ្ជើញតារាចម្រៀងកិត្តិយស និង អតីតសិស្ស ដើម្បីមកចូលរួមសម្ដែង និង ផ្សព្វផ្សាយពីវឌ្ឍនៈភាពរបស់សាលា ពិតជាសោកស្ដាយ និង សុំអភ័យទោសពីប្អូនប្រុស Taa Zvet និង ក្រុមការងាររបស់ប្អូន ចំពោះរឿងដែលបានកើតឡើងជាយថាហេតុនៅពេល ដែលប្អូនកំពុងតែសម្ដែង ដែលធ្វើឱ្យប៉ះពាល់យ៉ាងធ្ងន់ដល់កិត្តិយសរបស់ប្អូន។ ខ្ញុំសុំការយោគយល់ និង អធ្យាស្រ័យពីប្អូនចំពោះរឿង ដែលបានកើតឡើងនេះ។ សូមប្អូនទទួលយកនូវការរាប់អានដោយស្មោះពីខ្ញុំ!!!»៕