ថ្មីៗនេះ អ្នកឧកញ៉ា គិត ម៉េង សេដ្ឋីវាល់លាននៅស្រុកខ្មែរ បានចែករំលែកសារមួយដ៏មានន័យ ដែលជាការលើកទឹកចិត្តទៅកាន់អ្នកដែលគិតថា ខ្លួនមានអម្រែកច្រើនតែឯង ហត់នឿយនឹងទំនួលខុសត្រូវ ឱ្យមានការគិតពិចារណាឡើងវិញ ដើម្បីមានកម្លាំងចិត្តបន្តដំណើរជីវិត។ ជាក់ស្តែង តាមការបង្ហោះនៅលើបណ្តាញសង្គមហ្វេសប៊ុក អ្នកឧកញ៉ា គិត ម៉េង បានសរសេររៀបរាប់យ៉ាងដូច្នេះថា ៖
«អ្នកខ្លះសួរថា៖ ហេតុអ្វីបានត្រូវតែជា «ខ្ញុំ» គ្រប់ពេលវេលា?
ពេលខ្លះ ការធ្វើខ្លួនជាអ្នកមានភាពធន់រឹងមាំ ហើយមានសមត្ថភាពគ្រប់គ្រង និង ដោះស្រាយអ្វីៗបាន អាចជាអាវុធមុខពីរ គឺផ្តល់ផលវិជ្ជមាន និង អវិជ្ជមាន។ មើលលើទិដ្ឋភាពមួយជ្រុង អ្នកមានអារម្មណ៍ថាខ្លួនមានមោទកភាព និង សម្រេចបានសមិទ្ធផលដែលបានមកពីការទទួលយកនូវទំនួលខុសត្រូវជាច្រើន និង ការធានាឱ្យអ្វីៗដំណើរការដោយរលូន រាប់ទំាងពីការទទួលខុសត្រូវក្នុងការគ្រប់គ្រងកិច្ចការផ្ទះ និង ការងារនៅកន្លែងធ្វើការ។
ប៉ុន្តែសូមទទួលស្គាល់ការពិតថា ជីវិតមិនមែនមានភាពស្រួល និង រីករាយគ្រប់ពេលនោះទេ។ អ្នកអាចមានអារម្មណ៍តានតឹង ឬលំបាកចំពោះការទទួលយកទំនួលខុសត្រូវតែម្នាក់ឯង ដើម្បីធ្វើកិច្ចការជាច្រើនដែលមានបញ្ហាប្រឈម។ មានពេលខ្លះអ្នកនឿយហត់ គឺនៅពេលដែលអ្នកបំពេញការងារច្រើន ដោយព្យាយាមសម្រេចឱ្យបានទៅតាមតម្រូវការក្នុងការងារ តម្រូវការគ្រួសារ និង គោលដៅផ្ទាល់ខ្លួន។ អ្នកត្រូវទទួលស្គាល់ថា អ្នកមិនអាចចៀសផុតពីអារម្មណ៍ធុញថប់ និង បញ្ហាប្រឈមក្នុងជីវិតបានទេ នៅពេលអ្នកទទួលយកទំនួលខុសត្រូវក្នុងការធ្វើកិច្ចការជាច្រើន។
ប៉ុន្តែ ទោះបីជីវិតជួបបញ្ហាប្រឈមក្នុងការធ្វើកិច្ចការលើសលប់ក៏ដោយ ក៏អ្នកមានអារម្មណ៍រីករាយដែរ ដោយសារតែអ្នកដទៃមានទំនុកចិត្តមកលើការងាររបស់អ្នក។ មិនថាវាជាការងាររៀបចំផែនការសម្រាប់គ្រួសារ ការដោះស្រាយបញ្ហានៅកន្លែងធ្វើការ ឬធ្វើអ្វីមួយសាមញ្ញសម្រាប់មនុស្សជាទីស្រលាញ់នោះទេ អ្នកគួរដឹងថាអ្វីៗដែលអ្នកបានធ្វើ ផ្តល់ផលវិជ្ជមានមកលើអ្នកដទៃ ឬស្ថានភាពណាមួយ ហើយនេះជារង្វាន់ដ៏មានតម្លៃសម្រាប់អ្វីដែលអ្នកបានធ្វើ ដោយសារតែអ្នកមានសមត្ថភាពដោះស្រាយរាល់កិច្ចការដែលបានប្រគល់ទៅឱ្យអ្នក។
អ្នកយល់ច្បាស់ពីតុល្យភាពរវាងការជួយអ្នកដទៃ និង ការមើលថែលើខ្លួនឯង ដោយអ្នកទទួលស្គាល់ថាវាជារឿងល្អក្នុងការស្នើអ្នកដទៃឱ្យជួយអ្នក ហើយអ្នកត្រូវការពេលសម្រាកពីបន្ទុកជាច្រើន ដើម្បីសុខុមាលភាពរបស់អ្នក។
ដូច្នេះ សម្រាប់អ្នកដែលយល់ថាខ្លួនតែម្នាក់ឯងជាពំនឹងរបស់អ្នកដទៃ ឬមានទំនួលខុសត្រូវច្រើនតែម្នាក់ឯងដើម្បីអ្នកដទៃ សូមអ្នកអបអរសាទរចំពោះកម្លាំង និង ភាពធន់របស់អ្នក។ ប៉ុន្តែសូមរម្លឹកខ្លួនយើងផងដែរថា អ្វីៗមិនមែនសុទ្ធតែងាយស្រួលនោះទេ។ បញ្ហាប្រឈម និង អារម្មណ៍តានតឹងគឺជាផ្នែកមួយនៃធម្មជាតិរបស់មនុស្ស។
ភាពខ្លាំងពិតប្រាកដមិនមែនមានន័យថា ធ្វើកិច្ចការទាំងអស់តែម្នាក់ឯង និង ធ្វើវាគ្រប់ពេលនោះទេ។ ភាពខ្លាំងពិតប្រាកដមានន័យថា អ្នកដឹងថាពេលណាដែលអ្នកត្រូវការឱ្យអ្នកដទៃជួយអ្នក និង ពេលណាដែលអ្នកត្រូវការសម្រាក ដើម្បីសុខុមាលភាពរបស់អ្នក។ មនុស្សខ្លាំង ឬមានសមត្ថភាពប៉ុនណាក៏ដោយ ក៏មានពេលខ្លះត្រូវការជំនួយពីអ្នកដទៃដែរ។
អ្នកមានសមត្ថភាពធ្វើរឿងនេះបាន!»៕
